الماتىدا تۇرعىنداردى الداعان تاعى ءبىر ريەلتوردىڭ ارەكەتى اشكەرەلەندى

كليەنتتەردى الداعان ريەلتور ۇستالدى

الماتىدا تۇرعىنداردى الداعان تاعى ءبىر ريەلتوردىڭ ارەكەتى اشكەرە بولدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

جەتىسۋ اۋداندىق پوليسيا باسقارماسىنىڭ مالىمەتى بويىنشا، ا.ەسىمدى ازاماتشا پاتەردى نارىقتىق باعادان تومەن باعاعا جالعا بەرۋ تۋرالى حابارلاندىرۋلار سالعان.

 «كليەنتتەرمەن كەزدەسىپ، جالعا بەرۋ شارتىن جاساعان. سونىمەن قاتار، ول جوندەۋ جۇمىستارىنا بايلانىستى جاڭا قوناقتاردى ورنالاستىرماس بۇرىن ولارعا پاتەردى كورسەتە المايتىنىنا سەندىرىپ، كليەنتتەردەن ءجۇز پايىز تولەم العان. اقشانى العاننان كەيىن ايەل بايلانىسقا شىعۋىن توقتاتقان. كۇدىكتى قاماۋعا الىندى. ءبىزدىڭ بولىمشەدە الاياقتىق فاكتىسى بويىنشا، ق ر قك-نىڭ 190-بابى 1-بولىگىنە سايكەس، قىلمىستىق ءىس تەرگەلۋدە. ءىستى قاراۋ بارىسىندا ونىڭ كەم دەگەندە وسىعان ۇقساس توعىز ەپيزودقا قاتىسى بولۋى مۇمكىن ەكەنى انىقتالدى. كەلتىرىلگەن شىعىننىڭ جالپى سوماسى 500 مىڭ تەڭگەدەن استى»، – دەيدى جەتىسۋ اۋداندىق پب باستىعىنىڭ ورىنباسارى اسحات داۋلەتياروۆ.

تەرگەۋ كەزەڭىندە ۇستالعان ادامعا قاتىستى قاماۋعا الۋ تۇرىندەگى بۇلتارتپاۋ شاراسى تاڭدالدى. ول ۋاقىتشا ۇستاۋ يزولياتورىنا قامالدى.