تۇرعىن ۇيدەن 65 ادام ەۆاكۋاسيالاندى.
الماتىداعى «اقكەنت» ىقشام اۋدانىندا ورنالاسقان توعىز قاباتتى تۇرعىن ۇيدەن ءورت شىقتى، دەپ حابارلايدى Almaty-akshamy.kz قالالىق تجد cىلتەمە جاساپ.
ءورت تۋرالى حابارلاما ساعات 14:30-دا تۇسكەن.
«قۇتقارۋشىلار جەتكەندە، 7-قاباتتاعى پاتەردىڭ لودجياسىندا جالپى الاڭى 10 شارشى مەتر جەر ورتەنىپ جاتقانى جانە 8-9 قاباتتارعا تارالۋ ءقاۋپى انىقتالدى. ادامداردى ەۆاكۋاسيالاۋ مەن قۇتقارۋ جۇمىستارى جۇرگىزىلدى. قابىلدانعان شارالاردىڭ ناتيجەسىندە 7 ادام قۇتقارىلىپ، 65 ادام، ونىڭ ىشىندە بالاسى بار ايەل ەۆاكۋاسيالاندى. ءورت 15:02-دە تولىعىمەن ءسوندىرىلدى. ءورتتىڭ شىعۋ سەبەبى انىقتالىپ جاتىر»، - دەلىنەدى قالالىق تجد حابارلاماسىندا.
الماتى قالالىق تجد ءورت قاۋىپسىزدىگىنىڭ قاراپايىم ەرەجەلەرىن ساقتاۋدى، ياعني ەلەكتر قۇرالدارىن قوسۋلى كۇيدە قاراۋسىز قالدىرماۋ، بالكونداردى جانعىش ماتەريالدارمەن قاپتاماۋ جانە تەمەكى شەكپەۋ تۋرالى ەسكەرتتى.