الماتى بالالار جەدەل مەديسينالىق كومەك ورتالىعىندا بىرەگەي ءارى كۇردەلى ساناتتاعى حيرۋرگيالىق وپەراسيالار جاسالدى.
وپەراسيا نەسەپ-جىنىس جۇيەسىنىڭ ءارتۇرلى تۋابىتكەن پاتولوگياسى بار بالالارعا جاسالدى.
تاڭدالعان ناۋقاستاردىڭ ەڭ كىشىسى 2 جاستان اسقان بولسا، ەڭ ۇلكەنى — 16 جاستا.
الماتى قالالىق دەنساۋلىق ساقتاۋ باسقارماسىنان اتاپ وتكەندەي، 11-14 جەلتوقسان ارالىعىندا بالالار شۇعىل مەديسينالىق كومەك كورسەتۋ ورتالىعىندا بالالار ۋرولوگتارىنا ارنالعان شەبەرلىك سىنىبى ءوتتى.
وعان لوندوننان بەلگىلى ۋرولوگيالىق حيرۋرگتاردىڭ ءبىرى دوكتور يمران مۋشتاك ارنايى شاقىرتىلدى.
«گيپوسپاديا سيندرومى ءجيى كەزدەسەدى، ونى تەك حيرۋرگيالىق وتا كومەگىمەن عانا ەمدەۋگە بولادى. ەگەر وتا ەرتە جاستا جاسالماسا، بالانىڭ ەسەيۋى قيىنعا سوعادى، ءزار شىعارۋ كەزىندە قولايسىزدىق تۋادى، مۇنداي دياگنوزى بار جاسوسپىرىمدەرگە ەرەسەك ومىرگە ءوتۋ قيىن. وتانىڭ مۇنداي ءتۇرى بىردەن ناتيجەگە باعىتتالمايدى، ول بالانىڭ جايلى الەۋمەتتەنۋىنە جاعداي جاساپ، بولاشاعىنا اسەر ەتەدى»، — دەپ اتاپ ءوتتى پروفەسسور يمران مۋشتاك.
پروفەسسور يمران مۋشتاكقا استانا، الماتى، قاراعاندى جانە كورشىلەس موڭعوليا، وزبەكستان جانە تاجىكستاننان كەلگەن بالالار حيرۋرگتارى كومەكتەستى.
وپەراسيا جاسالعان توعىز بالانىڭ ءبارى پالاتاعا اۋىستىرىلدى، ولاردىڭ جاعدايى ءبىرقالىپتى.
«وتا كەزىندە پلاستيكالىق تۇزەتۋ ءادىسىن قولدانىپ، تەرىنى اۋىستىردىق: تەرى جامىلعىلارى قۇلاقتىڭ ارتىنان الىنادى جانە ۇلداردا ۋرەترانىڭ اناتوميالىق دۇرىس ءپىشىنى جاسالادى. ءبىز ءبىر دە ءبىر وتاندىق اۋرۋحانادا جاسالمايتىن وپەراسيالاردى تاڭدادىق، قازاقستاننىڭ ءار وڭىرىنەن بالالار شاقىرىلدى. بالالار ورتالىقتا مامانداردىڭ باقىلاۋىندا بولادى، بۇل جاعدايدا ناۋقاس ءۇشىن وتادان كەيىنگى كۇتىم، العاشقى وڭالتۋ جانە باقىلاۋ وتە ماڭىزدى»، — دەيدى الماتى بالالار جەدەل مەديسينالىق كومەك كورسەتۋ ورتالىعى ۋرولوگيا ءبولىمىنىڭ مەڭگەرۋشىسى ازامات رايەۆ.