الماتىدا كۇن سايىن 50-دەن استام قۇتقارۋشى، 12 تەحنيكا جانە 19 قىزمەتتىك يت كەزەكشىلىككە شىعىپ، توتەنشە جاعدايعا تاپ بولعان الماتىلىقتارعا كومەك كورسەتەدى، دەپ حابارلايدى aqshamnews.kz
بۇل تۋرالى الماتى قالاسى توتەنشە جاعدايلاردى جويۋ باسقارماسىنىڭ باسشىسى، ازاماتتىق قورعاۋ پودپولكوۆنيگى دميتريي يارسيەۆ جانە قۇتقارۋ قىزمەتىنىڭ وكىلى حوزى بۇركىتبايحان مالىمدەدى.
دميتريي يارسيەۆتىڭ ايتۋىنشا، الماتىدا ەكى نەگىزگى قۇتقارۋ جاساعى جۇمىس ىستەيدى — رەسپۋبليكالىق جەدەل-قۇتقارۋ جاساعى (رجقج) جانە قالالىق قۇتقارۋ قىزمەتى. ولاردىڭ قۇرامىندا 308 مامان مەن 447 تەحنيكا، سونىڭ ىشىندە ءۇش تىكۇشاق بار. كۇندەلىكتى كەزەكشىلىكتە 42 قۇتقارۋشى، 7 تەحنيكا جانە 6 قىزمەتتىك يت بار رجقج، سونداي-اق 5 تەحنيكا مەن 13 يت بار 14 قۇتقارۋ قىزمەتىنىڭ قىزمەتكەرى بولادى.
سونىمەن قاتار، تجد وكىلى دميتريي يارسيەۆ ەرىكتىلەرمەن، سونىڭ ىشىندە «قۇتقارۋشىلار مەن جولسەرىكتەردى تاۋعا دايارلاۋ ورتالىعى»، «ليدەر KZ» جانە الپينيزم فەدەراسياسى سياقتى ۇيىمدارمەن ماڭىزدى سەرىكتەستىك ورناتىلعانىن اتاپ ءوتتى. قازىرگى ۋاقىتتا سپورتشىلار، الپينيستەر جانە جول تالعامايتىن كولىكتەردىڭ يەلەرى قاتارىنان 258 ەرىكتى قۇتقارۋشى تىركەلگەن.
حوزى بۇركىتبايحاننىڭ ايتۋىنشا، 2024 جىلدىڭ العاشقى توعىز ايىندا 210 ىزدەۋ-قۇتقارۋ وپەراسياسى جۇزەگە اسىرىلدى، ولاردىڭ 208ء-ى تاۋدا ءوتتى. بۇل وپەراسيالار بارىسىندا 396 ادام، ونىڭ ىشىندە 59 بالا قۇتقارىلدى.