الماتىداعى 83 قالالىق كوللەدجدە 73 مىڭعا جۋىق ستۋدەنت ءبىلىم الۋدا
الماتى اكىمى باقىتجان ساعىنتايەۆتىڭ توراعالىعىمەن كوللەدجدەر ديرەكتورلارى مەن ساراپشىلاردىڭ قاتىسۋىمەن وتكەن جۇمىس كەڭەسى بارىسىندا وڭىرلىك ەرەكشەلىكتەردى، ونەركاسىپ ورىندارداعى كادرلارعا قاجەتتىلىكتى جانە «باستاۋ بيزنەس» جوباسىنىڭ «ەڭبەك» باعدارلاماسى اياسىندا قىسقا مەرزىمدى كۋرستاردا وقىتۋ بويىنشا جۇرگىزىلىپ جاتقان جۇمىستى ەسكەرە وتىرىپ، مامانداردى دايارلاۋ ماسەلەلەرى قارالدى، دەپ حابارلايدى Almaty-akshamy.kz.
الماتى قالاسى ءبىلىم باسقارماسىنىڭ مالىمەتىنشە، قازىرگى كەزدە 83 قالالىق كوللەدجدە 73 مىڭعا جۋىق ستۋدەنت ءبىلىم الۋدا. بۇل رەتتە 50%-دان استامى – مەملەكەتتىك تاپسىرىس بويىنشا. قالانىڭ ءىرى كاسىپورىندارىنىڭ دەرەگى بويىنشا شتاتتىق قىزمەتكەرلەردىڭ 70%-ى كوللەدجدەر تۇلەكتەرى بولىپ تابىلادى. ەڭبەك نارىعى بىلىكتى جۇمىسشى كادرلاردى قاجەت ەتەدى، ال تجكب سالاسىنىڭ ءرولى ارتۋدا.
قالا اكىمى ب. ساعىنتايەۆ ورتا بۋىن ماماندارىن دايارلاۋ تاسىلدەرىن قايتا قاراۋدى تاپسىردى. قالادا تۇرعىن ۇي-كوممۋنالدىق شارۋاشىلىعىنىڭ، ينجەنەرلىك ينفراقۇرىلىمنىڭ بىلىكتى قىزمەتكەرلەرى قاجەت. اۆتوپاركتەردە جۇرگىزۋشىلەر مەن مەحانيكتەر تاپشى. قۇرىلىس سەكتورىندا جۇمىسشىلار جەتىسپەيدى.
سوندىقتان دايىندىق ساپاسىن ارتتىرۋ ماقساتىندا مەكتەپتەردى عانا ەمەس، قوسىمشا ءبىلىم بەرۋ ۇيىمدارى مەن مۇددەلى ۇيىمداردى دا تارتا وتىرىپ، وقۋشىلاردىڭ ەرتە كاسىپتىك باعدارلاۋىن ۇيىمداستىرۋ بويىنشا جۇمىس جۇرگىزىلۋدە. ساراپشىلار قاۋىمداستىعىمەن بىرلەسىپ، بولاشاقتا سۇرانىسقا يە ماماندىقتاردىڭ بولجامدى ءتىزىمىن جاساۋ جوسپارلانۋدا.
«جاس مامان» جوباسى اياسىندا ماتەريالدىق-تەحنيكالىق بازانى نىعايتۋ ماقساتىندا كوللەدجدەر ءتۇرلى سالالار بويىنشا زاماناۋي قۇرىلعىلارمەن جابدىقتالۋدا. دوتاسيالىق كوللەدجدەردى ءىرى كاسىپورىندارعا سەنىمدى باسقارۋعا بەرۋ مۇمكىندىگى قاراستىرىلۋدا. مەملەكەتتىك تاپسىرىس اياسىندا جۇمىس ىستەيتىن جەكە كوللەدجدەردە ستۋدەنتتەردى جۇمىسشى ماماندىقتارى بويىنشا وقىتۋ مۇمكىندىگىن قاراستىرۋ ۇسىنىلادى.
سونىمەن قاتار، باسقا قالادان سىرتتان ستۋدەنتتەرگە ارنالعان جاتاقحانالارداعى ورىندار ماسەلەسى كەزەڭ-كەزەڭىمەن شەشىلۋدە. وتكەن جىلى تۇركسىب اۋدانىندا №1 پەداگوگيكالىق كوللەدجىنىڭ 300 ورىندى جاڭا جاتاقحاناسى پايدالانۋعا بەرىلدى.
كەلەسى جىلعا 600 ورىندى ەكى جاتاقحانا قۇرىلىسىنىڭ جسق ازىرلەنۋدە. ماسەلەن، جەتىسۋ اۋدانىندا جۇمىس ىستەپ تۇرعان اۆتومەحانيكالىق كوللەدج جانىنان جاتاقحانا سالۋ، سونداي-اق الاتاۋ اۋدانىندا جاتاقحاناسى بار جاڭا كاسىپتىك-تەحنيكالىق كوللەدج سالۋ جوسپارلانۋدا. قۇرىلىس جۇمىستارىن باستاۋ 2022 جىلعا جوسپارلانعان.