الماتىدا كوشەتتەردى تەگىن تاراتۋ بويىنشا «جاسىل اۋلا» كۇزگى اكسياسى باستالادى
الماتى قالاسىنىڭ ەكولوگيا جانە قورشاعان ورتا باسقارماسى جىل سايىن وتەتىن «جاسىل اۋلا» اكسياسى اياسىندا قالانى كوگالداندىرۋ جانە جاسىل قوردى ساقتاۋ باعدارلاماسىن جالعاستىرىپ كەلەدى. وسى ماۋسىمداعى اكسيانىڭ باستالۋى «تازا قازاقستان» رەسپۋبليكالىق باعدارلاماسىنا ورايلاستىرىلدى، دەپ حابارلايدى aqshamnews.kz
2024 جىلدىڭ كۇزگى كەزەڭىندە قالا تۇرعىندارى كوپقاباتتى ۇيلەردىڭ اۋلالارى مەن قوعامدىق ورىنداردى كوگالداندىرۋ ءۇشىن جاپىراقتى اعاشتاردىڭ كوشەتىن تەگىن الا الادى.
كوكتەمگى كەزەڭدە وتكەن اكسياعا قالا تۇرعىندارى بەلسەندى قولداۋ كورسەتتى: جەكە جانە زاڭدى تۇلعالاردان 200-دەن استام ءوتىنىم قابىلداندى. كوكتەمگى ناۋقاننىڭ ناتيجەسىندە تۇرعىندارعا 3 مىڭنان استام جاپىراقتى اعاش كوشەتتەرى تاراتىلدى. بۇل باستاما قالا تۇرعىندارىنىڭ ەكولوگيالىق بەلسەندىلىگىن ارتتىرۋ جانە مەگاپوليس تۇرعىندارى ءۇشىن جايلى جاسىل ايماقتار قۇرۋ بويىنشا ماڭىزدى قادام بولدى.
اكسيانىڭ كۇزگى كەزەڭى ازاماتتاردان ءوتىنىم قابىلداۋدان باستالادى. 2024 جىلدىڭ 23 قىركۇيەگى مەن 4 قازانى ارالىعىندا الماتىلىقتار كوپقاباتتى ۇيلەردىڭ اۋلالارى مەن جالپىعا ورتاق اۋماقتارعا اعاش وتىرعىزۋ ءۇشىن كوشەت الۋعا ءوتىنىم بەرە الادى. ءوتىنىم قابىلداۋدىڭ باستالعانى تۋرالى اقپارات الماتى قالاسى اكىمدىگىنىڭ رەسمي سايتىندا جاريالانادى.
اكسياعا قاتىسۋ ءۇشىن Jasyl.aula.almaty@gmail.com ەلەكتروندى پوشتاسىنا مىناداي مالىمەتتەردى جىبەرۋ قاجەت:
- باستاماشىل تۇلعانىڭ ءاتى-جونى جانە بايلانىس دەرەكتەرى، وتىرعىزىلاتىن جەردىڭ ناقتى مەكەنجايى؛
- جوسپارلانعان وتىرعىزۋ ورنىنىڭ بىرنەشە فوتوسۋرەتى (ورىندى باعالاۋ ءۇشىن پانورامالىق فوتوسۋرەت بولعانى ءجون)؛
- قاجەتتى كوشەتتەردىڭ سانىن كورسەتۋ.
كوشەتتەر 2024 جىلعى 12-13 قازاندا الماتى قالاسى، اۋەزوۆ اۋدانى، يۋريي كيم كوشەسى، 9ء-ۇي مەكەنجايىندا («Eco Almaty» ج ش س) تاراتىلادى. اكسياعا قاتىساتىن تۇرعىندار اعاش وتىرعىزعاننان كەيىن فوتوەسەپ ۇسىنۋى قاجەت.
اكسيا تۋرالى قوسىمشا اقپارات الۋ ءۇشىن الماتى قالاسىنىڭ ەكولوگيا جانە قورشاعان ورتا باسقارماسىنىڭ جاسىل قور مونيتورينگى جانە باسقارۋ بولىمىنە +7 771-161-98-50 تەلەفونى ارقىلى حابارلاسۋعا بولادى.
«جاسىل اۋلا» اكسياسى – الماتى تۇرعىندارىنىڭ شاھاردى كوگالداندىرۋعا، ونى ودان ءارى جاسىل ءارى جايلى ەتۋدىڭ تاماشا مۇمكىندىگى.