الداعى جىلدارى ەلىمىزدە اقپاراتتىق-كوممۋنيكاسيالىق تەحنولوگيالار سەكتورىنداعى ايەلدەردىڭ ۇلەسى 45%-كە جەتەدى.
قازىرگى كورسەتكىش – 30%. سوندىقتان قىز-كەلىنشەكتەردى اقپاراتتىق تەحنولوگيا باعىتىنا كوبىرەك تارتۋ كەرەك. بۇل تۋرالى الماتىدا وتكەن ترەنينگتە ايتىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
شارانى كوممەرسيالىق ەمەس ۇيىمداردىڭ ءبىرى ۇيىمداستىردى. باسقوسۋ بارىسىندا ستارتاپتان بيزنەس باستاۋ، سيفرلىق ترانسفورماسيالاۋ مەن كاسىپكەرلىكتى قازىرگى وزگەرىستەرگە بەيىمدەۋ باعىتتارى تالقىلاندى. ۇيىمداستىرۋشىلاردىڭ ايتۋىنشا، بىلتىر IT-Aiel باعدارلاماسىنا 2500-دەن استام جۇمىسسىز ايەل تارتىلعان. ولار اقپاراتتىق تەحنولوگيالار سالاسىنداعى ماماندىقتاردى مەڭگەرگەن. اتاپ ايتقاندا، سايتتار مەن ءموبيلدى قوسىمشالار جاساۋدى ۇيرەنىپ، ءوز قىزمەتتەرىن فريلانسەرلىك الاڭداردا ساتۋعا داعدىلانعان.
«وسى جىلدان باستاپ Technogirls دەگەن كلۋبىمىز اشىلدى. بۇل كلۋبتا 16 جاستان 23 جاسقا دەيىنگى ستۋدەنت قىزدار اقىسىز وقۋ الا الادى. No-code-low-code دەگەن – وقۋدىڭ اتى. ول ءسىز كودتى جاتىق مەڭگەرمەي-اق، ءوزىڭىزدىڭ سايتىڭىزدى، قوسىمشاڭىزدى جاساي الاسىز جانە دە ونى قالاي ساتۋعا بولاتىنىن ۇيرەنە الاسىز. بۇنى قىزدار 1 ناۋرىزدان باستاپ اقىسىز وقىپ جاتىر»، - دەيدى كوممەرسيالىق ەمەس ۇيىمنىڭ اتقارۋشى ديرەكتورى بالجان بالتابايەۆا.