8 جەلتوقسانعا قاراعان ءتۇنi الماتىنىڭ تاۋ جانە تاۋ بوكتەرىندەگى اۋداندارىندا قار جاۋىپ، كۇن سۋىتتى. «قازگيدرومەت» رمك دەرەكتەرىنە سايكەس، 9 جەلتوقساندا جاڭبىر، جابىسقاق قار، تۇمان ءتۇسىپ، جەلدىڭ كۇشەيىپ، كوكتايعاق پايدا بولۋى مۇمكىن. ال 10 جەلتوقسانعا قاراعان ءتۇنى قالادا 6-9 سم، ال تاۋلى ايماقتا 15-20 سم-گە دەيىن قار تۇسەتىنى بولجانعان.
وسىعان بايلانىستى الماتىنىڭ كوممۋنالدىق قىزمەتى كۇشەيتىلگەن جۇمىس رەجيمىنە كوشتى. 8 جەلتوقسان تۇنىندە كوشە-جول جەلىسىنە كوكتايعاقتىڭ الدىن الۋ ماقساتىندا ارنايى قوسپالار سەبىلدى. جۇمىس تاۋلىك بويى ۇيىمداستىرىلىپ، ارنايى تەحنيكا مەن جەدەل بريگادالار جۇمىلدىرىلدى.
تۇنگى جۇمىس بارىسىندا 1 000-نان استام ارنايى تەحنيكا، 2،7 مىڭ جۇمىسشى جانە 75 جەدەل بريگادا كەزەكشىلىك اتقاردى. ەڭىستە، دوڭدە جانە كوكتايعاق ءجيى پايدا بولاتىن ايماقتارعا پاترۋلدىك باقىلاۋ كۇشەيتىلدى. الماتى قۇتقارۋ قىزمەتى 15 تەحنيكا مەن 50 قىزمەتكەردى، توتەنشە جاعدايلار دەپارتامەنتى 53 تەحنيكا مەن 244 قىزمەتكەردى تارتتى.
جۇمىس بارىسىندا بارلىعى 553،4 توننا كوكتايعاققا قارسى ماتەريال قولدانىلدى. ەڭ اۋقىمدى جۇمىس كوكتايعاق ءقاۋپى جوعارى سانالاتىن بوستاندىق جانە مەدەۋ اۋداندارىندا جۇرگىزىلدى.
الماتى اكىمدىگى، اۋدان اكىمدىكتەرى، كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسى، پوليسيا دەپارتامەنتى، «الماتى تازالىق» كاسىپورنى جانە مەردىگەر ۇيىمدار جولدىڭ جايىن تاۋلىك بويى باقىلاپ وتىر. الداعى كۇندەرى اۋا تەمپەراتۋراسى تومەندەگەن جاعدايدا ماگيسترالدىق كوشەلەرگە قوسىمشا قوسپا سەبىلەدى.