الماتىدا تۋريستەردىڭ جايلىلىعى مەن قاۋىپسىزدىگى ءۇشىن تاۋ مارشرۋتتارىنىڭ اتلاسى مەن كارتاسى جارىق كوردى، دەپ حابارلايدى aqshamnews.kz
الماتى قالاسىنىڭ تۋريزم باسقارماسى مەن Almaty Tourism Bureau تۋريستەر مەن قالا تۇرعىندارىنىڭ تاۋدا قاۋىپسىزدىگىن قامتاماسىز ەتۋ ماقساتىندا اقپاراتتىق ماتەريالدار ازىرلەدى: تاۋ مارشرۋتتارىنىڭ اتلاسى، تاۋ مارشرۋتتارىنىڭ كارتاسى جانە «تاۋ شىڭدارى مەن قاۋىپسىزدىك» اتتى بروشيۋرا.
- تاۋ مارشرۋتتارىنىڭ اتلاسىندا ايماقتاعى بەس تانىمال مارشرۋت تۋرالى اقپارات جيناقتالعان. اتلاستا تەك مارشرۋتتاردىڭ سيپاتتاماسى عانا ەمەس، سونىمەن قاتار جورىققا دايىندىق بويىنشا ۇسىنىستار، قاجەتتى قۇرال-جابدىقتاردىڭ بولۋى، جەرگىلىكتى جەرلەردە باعدار الۋ بويىنشا كەڭەستەر جانە قاۋىپسىزدىك ەرەجەلەرى بەرىلگەن. بۇل اتلاس تاۋ دەمالىسىن ۇناتاتىندار ءۇشىن تاپتىرماس سەرىك بولماق.
- تاۋ مارشرۋتتارىنىڭ كارتاسى كىشى الماتى جانە ۇلكەن الماتى شاتقالدارىنىڭ مارشرۋتتارىن قامتيدى. ول ناۆيگاسيانى ىڭعايلى ەتىپ، قاجەتتى شارتتى بەلگىلەردى كورسەتكەن، بۇل تۋريستەرگە جەرگىلىكتى جەردە وڭاي باعىت الۋعا مۇمكىندىك بەرەدى. اتالمىش كارتا الماتىنىڭ تابيعي سۇلۋلىعىن تەرەڭىرەك زەرتتەگىسى كەلەتىن اۋەسقويعا دا، تاجىريبەلى تۋريستەرگە دە پايدالى بولادى.
- «تاۋ شىڭدارى مەن قاۋىپسىزدىك» بروشيۋراسى – تاۋدا ءقاۋىپسىز ارەكەت ەتۋگە ارنالعان پراكتيكالىق نۇسقاۋلىق. وندا تۋريستەر بەتپە-بەت كەلۋى مۇمكىن قاۋىپ-قاتەرلەر قاراستىرىلعان. بروشيۋرا بىركۇندىك جانە كوپكۇندىك جورىقتارعا ارنالعان ءتىزىمدى قامتيدى، بۇل تۋريستەرگە كەز كەلگەن ساپارعا دۇرىس دايىندالۋعا كومەكتەسەدى.
ماتەريالدار Visit Almaty اقپاراتتىق ورتالىقتارىندا جانە تومەندەگى سىلتەمە بويىنشا ءۇش تىلدە تەگىن قولجەتىمدى: https://www.gov.kz/memleket/entities/almaty-tourism/documents/details/722138؟lang=ru.