يدەياسىن ىسكە اسىرعىسى كەلەتىن جاستار ميلليون تەڭگەگە دەيىن الا الادى
الماتى قالاسىنىڭ جاستار ساياساتى باسقارماسىنىڭ قولداۋىمەن «ادىرنا» ۇلتتىق-ەتنوگرافيالىق بىرلەستىگى» قوعامدىق قورى «تاۋەلسىزدىك ۇرپاقتارى» گرانتتارىن بەرۋ ماقساتىندا اۋقىمدى ءىس-شارالاردى جۇزەگە اسىرىپ جاتىر. الماتىنىڭ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا، الماتى قالاسىنىڭ جاستار ساياساتى باسقارماسى باسشىسىنىڭ ورىنباسارى الماز كەڭەسباي مەن «ادىرنا» قوعامدىق قورىنىڭ جەتەكشىسى كارىم يسلام وسى بايقاۋعا تولىعىراق توقتالدى، دەپ حابارلايدى aqshamnews.kz
جوبانىڭ نەگىزگى ماقساتى – تاۋەلسىز قازاقستاننىڭ دامۋىنا ۇلەس قوساتىن، زامانعا ساي، ءبىلىمدى، باستاماشىل جانە وتانشىل جاس ۇرپاقتى قولداۋ. گرانتتار جاستاردىڭ يننوۆاسيالىق، شىعارماشىلىق، عىلىمي، كاسىپكەرلىك، مادەني جانە الەۋمەتتىك جوبالاردى ىسكە اسىرۋىنا مۇمكىندىك بەرمەك. ءوتىنىشتى بيىلعى 1 مامىردان 1 تامىزعا دەيىن قابىلدايدى.
«بۇل جوبا – جاستاردىڭ ەل يگىلىگىنە باعىتتالعان يدەيالارىن جۇزەگە اسىرۋعا ارنالعان ۇلكەن مۇمكىندىك. ءبىز بەلسەندى جاستاردىڭ ءارقايسىسىنا قولداۋ كورسەتۋگە ءازىرمىز»، – دەيدى الماز كەڭەسباي.
بايقاۋ مىنا باعىتتار بويىنشا وتەدى:
• عىلىم – عىلىمي زەرتتەۋلەر مەن جوبالاردى قولداۋ؛
• مادەنيەت – ۇلتتىق مۇرانى ناسيحاتتاۋ؛
• اقپاراتتىق تەحنولوگيالار – IT شەشىمدەر مەن ستارتاپتار؛
• بيزنەس – جاڭا بيزنەس-يدەيالاردى ىسكە اسىرۋ؛
• مەديا – تانىمدىق جانە پايدالى كونتەنت قۇرۋ.
«ءبىز جاستاردىڭ قوعامعا پايدالى جوبالاردى ىسكە اسىرىپ، ازاماتتىق بەلسەندىلىگىن ارتتىرۋىنا كومەكتەسكىمىز كەلەدى. ماقساتىمىز يدەيانى قارجىلاندىرۋ عانا ەمەس، بەلسەندى جاستاردىڭ قوعامداستىعىن دا قالىپتاستىرۋ»، - دەپ قوستى كارىم يسلام.
ءار گرانتتىڭ سوماسى – 1 000 000 تەڭگە. جالپى 13 جەڭىمپاز انىقتالادى.
بايقاۋ - وتىنىمدەردى قابىلداپ، ونى باعالايتىن ەكى كەزەڭنەن تۇرادى. كوميسسيا قۇرامىنا مەملەكەتتىك ورگاننىڭ وكىلدەرى، ساراپشىلار مەن عالىمدار كىرگەن.
جوبانىڭ كەڭسەسى الماتى قالاسى، تيميريازيەۆ كوشەسى، 59 ا مەكەنجايىندا جۇمىس كۇندەرى 09:00-دەن 18:30-عا دەيىن جۇمىس ىستەيدى (سەنبى، جەكسەنبى جانە مەرەكە كۇندەرىن قوسپاعاندا).
قوسىمشا اقپارات پەن ونلاين ءوتىنىش بەرۋگە ارنالعان جوبانىڭ پلاتفورماسى: opengrantalmaty.kz
بايلانىس تەلەفوندارى سايتتا كورسەتىلگەن.
ۇيىمداستىرۋشىلار الماتىنىڭ بەلسەندى جاستارىن بايقاۋعا قاتىسىپ، ءوز يدەياسىن جۇزەگە اسىرۋعا شاقىرادى.