الماتى قالاسى ايماعىندا 51 مورەنالىق كول بار.
الماتى تاۋلارىندا سەل ءقاۋىپتى كەزەڭ باستالۋىنا بايلانىستى 11 شىلدەدەن باستاپ «قازسەلدەنقورعاۋ» الماتى قالالىق توتەنشە جاعدايلار دەپارتامەنتىمەن بىرلەسىپ كىشى جانە ۇلكەن الماتى، قارعالى جانە اقساي وزەندەرى باسسەيندەرىندەگى اسا ءقاۋىپتى كولدەردى سۋدان بوساتۋ بويىنشا الدىن الۋ جۇمىسىن قولعا الدى، دەپ حابارلايدى Almaty-aksamy.kz قازاقپاراتقا سىلتەمە جاساپ.
«الماتى قالاسى ايماعىندا 51 مورەنالىق كول بار. ونىڭ ىشىندە جارىلۋ ءقاۋپى بار 6-ۋىندا سۋدان بوساتۋعا ارنالعان الدىن الۋ جۇمىسى جۇرگىزىلەدى. كولدەردى سۋدان بوساتۋ، ەۆاكۋاسيالىق ارنالاردى تەرەڭدەتۋ، قوسىمشا سيفوندى قۇبىر ورناتۋ جانە مونتاجداۋ بويىنشا الدىن الۋ جۇمىسىن ارنايى تەحنيكا مەن قازسەلدەنقورعاۋ ماماندارى جۇزەگە اسىرىپ جاتىر. سيفون قۇبىرلار مەن قاجەتتى ماتەريالداردى مۇزدىق كولدەرگە جەتكىزۋ «قازاۆياقۇتقارۋ» كومەگىمەن جۇزەگە استى»، - دەلىنەدى قالالىق تجد حابارلاماسىندا.
مورەنالىق كولدەردىڭ جاعدايىنا باقىلاۋ 11 كەزەڭدى جانە 9 تۇراقتى گيدروبەكەت ارقىلى جۇرگىزىلەدى.
بۇل بەكەتتەر تۇرمىسقا قاجەتتى زاتتارمەن، گيدرومەتەورولوگيالىق جانە بايلانىس قۇرىلعىلارىمەن جابدىقتالعان ءمودۋلدى تۇرعىن ۇيلەرمەن قامتاماسىز ەتىلگەن.
«قازىرگى تاڭدا مورەنالىق كولدەردىڭ تولعانى بايقالىپ وتىر. ءبىراق ونداعى سۋ دەڭگەيى شەكتىك بەلگىگە جەتكەن جوق. سونىمەن قاتار، سەل ءقاۋپى مونيتورينگىنىڭ اۆتوماتتاندىرىلعان جۇيەسىنىڭ 31 ستانساسىنىڭ كومەگىمەن مورەنالىق كولدەردىڭ جاعدايىن باعالاۋعا جانە قازىرگى ۋاقىت رەجيمىندە گيدرومەتەورولوگيالىق جاعدايدى قاشىقتان باقىلاۋعا بولادى. بۇل جۇيە سەل ءقاۋپى بار كەزەڭدەگى جاعدايدى تاۋلىك بويى باقىلاۋدا ۇستاۋعا مۇمكىندىك بەرەدى. جالپى، ماۋسىم-قىركۇيەك ارالىعىندا الماتى تاۋلارىنداعى سەل جاعدايى قازسەلدەنقورعاۋ جانە تجد مامانداردىڭ باقىلاۋىندا بولادى»، - دەپ حابارلادى الماتى قالالىق توتەنشە جاعدايلار دەپارتامەنتى.