ءىرى قارۋ دۇكەنىن توناعان كۇدىكتى ۇستالدى
اۋەزوۆ اۋدانىنىڭ پوليسيا قىزمەتكەرلەرىمەن انىقتالعانداي، ي. ەسىمدى ەر ادام جاپپاي تارتىپسىزدىكتەرگە جانە باسقا دا زاڭسىز ارەكەتتەرگە بەلسەندى قاتىسقان. سونىمەن قاتار ءىرى قارۋ دۇكەنىن توناپ، ودان 10 پاترونى بار “BrowntnG” تەگىس ۇڭعىلى مىلتىعىن ۇرلاپ كەتكەن، دەپ حابارلايدى Almaty-akshamy.kz Polisia.kz-كە سىلتەمە جاساپ.
قاسكوي مىلتىقتى 5 ىقشاماۋدانداعى اۋلالاردىڭ ءبىرىنىڭ قوقىس جاشىگىنە تىعىپ قويعان. بىرنەشە كۇننەن كەيىن كۇدىكتى تاكسيگە وتىرىپ، مىلتىق جاسىرىنعان جەرگە كەلگەن. كولىك جۇرگىزۋشىسى جولاۋشىنىڭ تەلەديدار جاشىگىنە قارۋ جاسىرىپ جۇرگەنىن بايقاپ، پوليسياعا حابارلاعان.
تۇتقىنداۋ كەزىندە ي.ەسىمدى ەر ادام اسكەري كيىمدە بولعان. ونى قايدان العانىن تەرگەۋ انىقتايتىن بولادى. قازىرگى ۋاقىتتا اتالعان فاكت بويىنشا سوتقا دەيىنگى تەرگەۋ امالدارى جۇرگىزىلۋدە. ۇستالعان ازامات ۋاقىتشا ۇستاۋ يزولياتورىنا قامالدى. الماتى قالاسىنىڭ كومەنداتۋراسى قامقور تۇرعىندارعا بەلسەندى ازاماتتىق ۇستانىمى جانە قالادا قۇقىقتىق ءتارتىپتى ورناتۋعا كومەكتەسكەنى ءۇشىن العىسىن بىلدىرەدى.