باۋىرلاس ەلدىڭ مادەني كۇندەرى الماتىداعى اباي الاڭىندا تاجىكستاننىڭ اۋىل شارۋاشىلىعى ونىمدەرى مەن ونەركاسىپ تاۋارلارىنىڭ كورمەسىنەن باستالدى.
رەسپۋبليكا سارايىنىڭ الدىنا ورناتىلعان شاتىرلاردا حالىق شىعارماشىلىعى تاۋارلارى مەن اۋىل شارۋاشىلىعى ونىمدەرى، ونىڭ ىشىندە كەپتىرىلگەن جەمىستەر مەن كوكونىستەر، قاۋىن-قاربىز سياقتى 200 توننادان استام ءونىم ۇسىنىلدى.
تاجىكستان رەسپۋبليكاسىنىڭ مادەنيەت كۇندەرى اياسىنداعى ايتۋلى شارانىڭ ءبىرى تاجىكستان دەلەگاسياسىنىڭ ىقىلاس اتىنداعى حالىق مۋزىكالىق اسپاپتار مۋزەيىنە ساپارى بولدى. تاجىكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى حايرۋللو يبودزودا جانە باسقا دا رەسمي تۇلعالار مۋزەيدى تاماشالاپ، تاجىك حالقىنىڭ كارناي، سۋرناي، رۋباب، دۋتور، تانبۋر سياقتى ۇلتتىق اسپاپتارىن مۋزەي قورىنا سىيعا تارتتى.
مادەني شارا قالامىزداعى «الاتاۋ» ءداستۇرلى ونەر تەاترىندا تاجىك حالقىنىڭ ۇلتتىق كيىمدەرى، حالىق شىعارماشىلىعى تاۋارلارى مەن سۋرەت كورمەسىنە ۇلاستى.
كورمەگە قازاقستان تاراپىنان مادەنيەت جانە سپورت ءمينيسترى اسحات ورالوۆ، الماتى قالاسى اكىمىنىڭ ورىنباسارى ارمان قىرىقبايەۆ قاتىستى.
«الاتاۋ» ءداستۇرلى ونەر تەاترىندا وتكەن تاجىكستان ونەر شەبەرلەرىنىڭ كونسەرتى مادەنيەت كۇندەرىن قورىتىندىلادى. بۇل شاراعا باۋىرلاس ەلدىڭ مادەنيەت ءمينيسترى زۋلفيا داۆلاتزودا، تاجىكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى حايرۋللو يبودزودا جانە الماتىداعى باس كونسۋلى راۆشان بوبوحونزودا قاتىستى.
كونسەرتتە اميردجون رۋزي، شاروفات ۋسمونزودا، نوزياي كاروماتۋللو، دجوۆيدون نوزيم، ساندجار سانگين، ديلوروم ساتتوري سىندى انشىلەرى ءان شىرقاپ، «زەبو»، «گۋلرەز»، «پاراستۋ» بي انسامبلدەرى تاجىكستاننىڭ ءار وبلىسىنا ءتان بي ونەرلەرىن ورتاعا سالدى. ءۇندى تىلىندە شىرقالعان ءان مەن وپەرالىق اريالار كورەرمەننىڭ ىستىق ىقىلاسىنا يە بولدى.
كەش سوڭىندا تاجىك ونەرپازدارى قازاقتىڭ ءبيىن بيلەپ، قازاقشا ءان سالىپ، قۇرمەت كورسەتتى.
