الماتىدان قاسكەلەڭ مەن ۇزىناعاشقا اۆتوبۋس مارشرۋتى اشىلدى
الماتى مەگاپوليسىنىڭ اگلومەراسيامەن كولىك بايلانىسىن نىعايتۋ ماقساتىندا 1 قاراشادان باستاپ تاعى ءۇش قالا ماڭى مارشرۋتى ىسكە قوسىلدى، دەپ حابارلايدى aqshamnews.kz
№245 مارشرۋت: ۇزىناعاش اۋىلىنىڭ اۆتوبەكەتىنەن – تولە بي-ياسساۋي اۆتوبەكەتىنە دەيىن. بۇل باعىتتا ۇلكەن سىيىمدىلىقتاعى 25 اۆتوبۋس قىزمەت كورسەتەدى. قوزعالىس ۋاقىتى: 5:45-تەن 23:00-گە دەيىن. تاسىمالداۋشى – «Ecobus service» ج ش س.
№254 مارشرۋت: قاسكەلەڭ – «سالەم» بازارى. مۇندا ۇلكەن سىيىمدىلىقتاعى 16 اۆتوبۋس جۇمىس ىستەيدى. قوزعالىس ۋاقىتى: 5:50-دەن 23:00-گە دەيىن. تاسىمالداۋشى – «ءمادينا» ج ش س.
№239 مارشرۋت: «ب.مومىش ۇلى» مەترو بەكەتى – دولان اۋىلى. بۇل باعىتتا 18 اۆتوبۋس قىزمەت كورسەتەدى. قوزعالىس ۋاقىتى: 5:30-دان 23:01-گە دەيىن. تاسىمالداۋشى – «Neo City Trans» ج ش س.
جول اقىسى قالا ىشىندەگى سياقتى 120 تەڭگە، بارلىق اۆتوبۋس «Onay» ەلەكتروندى بيلەتتەۋ جۇيەسىمەن جابدىقتالعان.
ايتا كەتۋ كەرەك، جولاۋشىلار مەن جۇكتى اۆتوكولىكپەن تاسىمالداۋ ەرەجەسىنە سايكەس، بۇل مارشرۋتتار تاسىمالداۋشىلارعا بايقاۋ وتكىزىلگەنگە دەيىن ۋاقىتشا بەرىلدى جانە سىناق رەجيمىندە جۇمىس ىستەيدى. مونيتورينگ ناتيجەسى بويىنشا مارشرۋتتاردىڭ قوزعالىس سىزبالارى جولاۋشىلار لەگى مەن حالىقتىڭ قاجەتتىلىگىنە قاراي تۇزەتىلەدى.
ەستەرىڭىزگە سالا كەتەيىك، وتكەن جىلى مەگاپوليس باسشىسى ەربولات دوسايەۆتىڭ تاپسىرماسىمەن 600 اۆتوبۋس پەن 100 تروللەيبۋس ساتىپ الىنىپ، 50-گە جۋىق ەلدى مەكەندى قامتيتىن 22 جاڭا باعىت، سونىڭ ىشىندە 10 قالا ماڭى مارشرۋتى ۇيىمداستىرىلدى. بيىل تاعى 600 اۆتوبۋس، 112 تروللەيبۋس جانە 100 ەلەكتر اۆتوبۋسى ساتىپ الىندى.