الماتى سىرتقى جارىقتاندىرۋ جۇيەسىن جاڭعىرتىپ جاتىر. بيىلعى 7 ايدىڭ ىشىندە قالانىڭ 8 اۋدانىندا 21 600 جارىق نۇكتەسى قالپىنا كەلتىرىلىپ، 230 شاقىرىم كابەل اۋىسىپ، جاڭادان 1 225 سىرتقى جارىق باعانى ورناتىلدى. ۇزدىكسىز جۇمىس ىستەگەندىكتەن ازاماتتاردىڭ جارىقتاندىرۋعا بايلانىستى ءوتىنىمى بىلتىرعىمەن سالىستىرعاندا 2،5 ەسەگە قىسقارىپ، بيىل 8 445-اق ارىز تۇسكەن.
وڭىرلىك كوممۋنيكاسيالار قىزمەتى ۇيىمداستىرعان پرەسس تۋر بارىسىندا جىل سوڭىنا دەيىن قالا كوشەلەرىنىڭ جارىقتاندىرۋ دەڭگەيىن 100 %-عا جەتكىزۋ جوسپارلانىپ جاتقانى بەلگىلى بولدى.
قالانىڭ نەگىزگى كوشەلەرىندە دە وسىنداي جۇمىس قولعا الىندى. مىسالى، سەيفۋللين داڭعىلى ەكى ەسە جارىق بولا ءتۇستى. ساتبايەۆ كوشەسىنەن الماتى 1 ۆوكزالىنا دەيىنگى ارالىقتاعى باعاندارعا ەكى شام بەكىتىلگەن يننوۆاسيالىق كونسولدار ورناتىلىپ جاتىر، بۇرىن ءار باعانعا ءبىر-بىر شامنان عانا ىلىنەتىن. جۇمىس بوستاندىق، المالى، جەتىسۋ مەن تۇركسىب اۋدانىندا دا جالعاستى. جولدان بولەك، جاياۋلار جۇرەتىن جاعى دا جارىقتاندىرىلدى. اباي مەن دوستىق داڭعىلىندا، سونداي-اق ناۋرىزباي باتىر، ساتبايەۆ، برۋسيلوۆسكيي، وتەگەن باتىر كوشەسىندە دە وسىنداي جوبا ىسكە اسىرىلدى.
تيميريازيەۆ كوشەسى دە جوبادان سىرت قالعان جوق. جەلتوكساننان جاندوسوۆقا دەيىنگى جەردەگى شامدار تۇگەل اۋىسىپ، جاياۋ جۇرگىنشىلەر جاعىنداعى ەسكى شامدار جاڭا LED جارىقديودتى شامدارعا اۋىستىرىلادى. تروتۋارلارىندا ءومىرى جارىق بولماعان جەردە جاڭادان تورشەر باعاندارى پايدا بولادى.
سەيفۋللين – شولوحوۆ قيىلىسىنداعى پاركتە اۆتوپوليۆ جۇيەسىن جۇرگىزەتىن مەردىگەردىڭ كەسىرىنەن ۇزىلگەن كابەل جەلىسى قالپىنا كەلتىرىلدى. اللەيالاردا جانعان شامدار اۋىستىرىلىپ، جارىق قالىپتى رەجيمدە جۇمىس ىستەپ تۇر.
رەسپۋبليكا سارايىنىڭ الدىنداعى اباي الاڭىندا شامامەن 1 شاقىرىم كابەل جەلىسى مەن ەسكىرگەن شامداردى (50 دانا) اۋىستىرا باستادى.
"سونداي-اق 28 گۆاردياشىلار-پانفيلوۆشىلار ساياباعىندا 250 شامدىق لامپالاردىڭ ورنىنا قۋاتى جوعارى جانە جارىعى مول LED جارىقديودتى شامداردى قويادى"، — دەدى پرەسس تۋر بارىسىندا "الماتى قالا جارىق" مكك سىرتقى جارىقتاندىرۋ قىزمەتىنىڭ باسشىسى نۇراسىل بەرىك.
شىعىس اينالما اۆتوجولىندا شامامەن 800 شام قۇرىلعىسىن قۋاتى تومەن (150 ۆت) شامالاردان قۋاتى جوعارى (200 ۆت) شامدارعا اۋىستىرۋ جۇمىسى جۇرگىزىلدى، بۇل جارىقتاندىرۋ دەڭگەيىن 20 دان 70 ليۋكسقا دەيىن ارتتىردى. رىسكۇلوۆ داڭعىلىندا دا وسىنداي جۇمىس باستالىپ، ءالى جالعاسىپ جاتىر.
سونىمەن بىرگە، بۇرىن جارىق بولماعان قالاداعى جەرلەرگە جاڭا جەلىلەر سالىنىپ جاتىر. جۇمىستى بارلىق 8 اۋداننىڭ اكىمدىكتەرمەن بىرلەسىپ قولعا العان. تەك "الماتى قالا جارىقتىڭ" كۇشىمەن بۇرىننان قاراڭعى كوشەلەر مەن سىڭار كوشەلەرگە شامامەن 400 باعان، 500 دەن استام كونسول مەن شامامەن مىڭ جاڭا شام ورناتىلدى.
جارىقتاندىرۋ جەلىلەرىن سالۋ مەن جاڭالاۋ جۇمىسىندا نەگىزگى جاۋاپكەرشىلىك اۋداندىق اكىمدىكتەر مەن قالالىق موبيلدىلىك باسقارماسىنا جۇكتەلەدى. پارك، سكۆەرلەر جانە وزەن ارنالارىن جارىقتاندىرۋ قوعامدىق كەڭىستىكتى دامىتۋ باسقارماسىنىڭ قۇزىرىندا. جولداردى جارىقتاندىرۋ — قۇرىلىس باسقارماسىنا جۇكتەلگەن. ال "الماتى قالا جارىق" مكك سىرتقى جارىقتاندىرۋ جەلىلەرىنىڭ قىزمەتى مەن جوندەۋ جۇمىسىنا جاۋاپتى.