ەلوردادا 22 تامىز كۇنى جاستارعا ارنالعان ەلىمىزدەگى ەڭ اۋقىمدى بوس جۇمىس ورىندارى جارمەڭكەسى وتەدى. ءىس-شارا جۇمىسشى ماماندىقتارى جىلى اياسىندا ۇيىمداستىرىلىپ وتىر.
جارمەڭكە «AMANAT» پارتياسىنىڭ «جاستار رۋحى» جاستار قاناتى مەن استانا قالاسى اكىمدىگىنىڭ قولداۋىمەن وتەدى. ۇيىمداستىرۋشىلاردىڭ ايتۋىنشا، نەگىزگى ماقسات – جاستارعا لايىقتى جۇمىس تابۋعا مۇمكىندىك جاساۋ، ولاردىڭ كاسىبي الەۋەتىن دامىتۋ جانە ەلدىڭ ادامي كاپيتالىن ارتتىرۋ.
شارا ە. راحمادييەۆ اتىنداعى مەملەكەتتىك اكادەميالىق فيلارمونيا عيماراتىندا (كەنەسارى كوشەسى، 32) وتپەك.
جارمەڭكە جاستار مەن جۇمىس بەرۋشىلەردىڭ تىكەلەي ديالوگ الاڭىنا اينالىپ، ەڭبەك نارىعىنداعى جاڭا مۇمكىندىكتەردى اشادى. مۇندا 70-تەن استام ءىرى جۇمىس بەرۋشى 1000-نان اسا بوس جۇمىس ورنىن ۇسىنادى.
قاتىسۋشىلاردىڭ اراسىندا ەلىمىزدىڭ جەتەكشى كومپانيالارى بار. اتاپ ايتقاندا:
- «KEGOC» اق،
- «قازاقتەلەكوم» اق،
- «DAR RAIL» ج ش س،
- «Home Credit Bank» اق،
- «قازمەديا ورتالىعى» اق،
- «بوگاتىر كومىر» ج ش س،
- «قازپوشتا» اق،
- قازاقستان حالىق بانكى» اق،
- Astana Hub جانە باسقا دا ۇيىمدار.
ۇيىمداستىرۋشىلاردىڭ پىكىرىنشە، جارمەڭكەنىڭ وتكىزىلۋى جۇزدەگەن جاس قازاقستاندىقتى جۇمىسپەن قامتۋعا جول اشادى. سونىمەن قاتار، بۇل شارا جۇمىسشى ماماندىقتارىنىڭ مارتەبەسىن ارتتىرۋعا، باسەكەگە قابىلەتتى ۇرپاق تاربيەلەۋگە جانە ەل ەكونوميكاسىن دامىتۋعا ىقپال ەتپەك.