الماتى ينفراقۇرىلىمىنا سالىنعان ينۆەستيسيالار اپاتتى زايتىپ، سۋ قۇبىرى جەلىلەرىنىڭ توزۋىن 54،5% - عا دەيىن تومەندەتتى، دەپ حابارلايدى aqshamnews.kz
«ينۆەستيسيالارعا ايىرباستاۋ ءتاريفى» باعدارلاماسىن ىسكە اسىرۋ كوممۋنالدىق ينفراقۇرىلىمدى جاڭارتۋعا، جەلىلەردىڭ اپاتتىلىعىن تومەندەتۋگە جانە كوممۋنالدىق سالا قىزمەتكەرلەرىنىڭ ەڭبەك جاعدايلارىن جاقسارتۋعا ىقپال ەتەدى.
وڭىرلىك كوممۋنيكاسيالار قىزمەتىنىڭ بريفينگىندە ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ الماتى قالاسى بويىنشا دەپارتامەنتىنىڭ باسشىسى اسەل بۋدەنەيەۆانىڭ ايتۋىنشا، 2029 جىلعا دەيىن ينفراقۇرىلىمنىڭ توزۋ دەڭگەيىن ايتارلىقتاي تومەندەتۋ جوسپارلانۋدا. مىسالى، 2024 جىلى مەگاپوليستە سۋمەن جابدىقتاۋ جۇيەلەرىنىڭ توزۋى 1% – عا، سۋ بۇرۋ-3% - عا ازايدى. ءقازىر جەلىلەردىڭ توزۋى تيىسىنشە 54،5% جانە 53،8% قۇرايدى.
اسەل بۋدەنەيەۆانىڭ ايتۋىنشا، باعدارلامانى ىسكە اسىرۋ كوممۋنالدىق سالا قىزمەتكەرلەرىنىڭ جالاقىسىن ارتتىرۋعا باعىتتالعان. بۇل كادرلاردىڭ ءجيى كەتىپ قالۋىن ازايتۋعا مۇمكىندىك بەرەدى، ءوز كەزەگىندە اپاتتاردى جويۋدى تەزدەتەدى جانە قالا تۇرعىندارىنا قىزمەت كورسەتۋدى جاقسارتادى.
«باعدارلامانىڭ اسەرى ايقىن. ءبىز جەلىلەردىڭ توزۋى بىرتىندەپ تومەندەپ، اپاتتى ازايتىپ، قىزمەتكەرلەرىمىزدىڭ لايىقتى ەڭبەك جاعدايلارىن الىپ جاتقانىن كورەمىز. بۇل قالانىڭ ءاربىر تۇرعىنىنا پايدا اكەلەتىن كەشەندى جۇمىس»، – دەپ اتاپ ءوتتى ول.
سپيكەردىڭ ايتۋىنشا، ۇلتتىق جوبا اياسىندا 2030 جىلعا دەيىن ەلەكتر، جىلۋ جانە سۋمەن جابدىقتاۋ سالالارىنداعى ينفراقۇرىلىمدى جاڭارتۋعا سۋبسيديالار بولىنەتىن بولادى. بۇل شارالار ينجەنەرلىك جەلىلەردى جاڭارتۋعا مۇمكىندىك بەرەدى.