اپاتتىڭ سالدارى كۇن سوڭىنا دەيىن رەتتەلمەك
الماتىدا سۋ قۇبىرى جارىلىپ، بىرنەشە كوشەنى سۋ باستى. كوممۋنالدىق قىزمەت تۇرعىنداردى مۇز بولعان بۇل جەردەن اينالىپ وتۋگە شاقىردى، دەپ حابارلايدى Almaty-akshamy.kz.
"مىڭبايەۆ كوشەسى، 49 مەكەنجايىندا سۋ قۇبىرىنىڭ جارىلۋىنا بايلانىستى ساعات 3:40-تان باستاپ سولتۇستىك باعىتتا ورنالاسقان كوشەلەردى، اسىرەسە، اۋەزوۆ كوشەسىن سۋ باسقان. سۋ رايىمبەك داڭعىلىنا دەيىن جەتكەن، ول جەردەن مۇمكىندىگىنشە ارىق جەلىسىنە بۇرىلىپ جاتىر"، - دەلىنگەن حابارلامادا.
كوكتايعاقتىڭ الدىن الۋ ءۇشىن الماتى تازالىق مقك قىزمەتكەرلەرى جول بويىنا 18 قۇمسەپكىش كولىكتىڭ كۇشىمەن، تروتۋارلارعا 4 تروتۋار تازالاۋشى كولىكپەن كوكتايعاققا قارسى ماتەريال سەبۋگە كىرىستى.
كوممۋنالدىق ينفراقۇرىلىمدى دامىتۋ باسقارماسىنىڭ مالىمەتىنشە، اپاتتىڭ سالدارى بۇگىنگى كۇننىڭ اياعىنا دەيىن رەتتەلەتىن بولادى.
سۋ باسقان ورىنداردا كوكتايعاق جابىنىنىڭ پايدا بولۋ ىقتيمالدىلىعىن ەسكەرە وتىرىپ، جۇرگىزۋشىلەردى جىلدامدىقتى ازايتىپ، كولىك اراسىنداعى اراقاشىقتىقتى ۇلعايتىپ، اپاتتى جاعدايدى تۋىنداتپاس ءۇشىن وقىس ارەكەتتەر جاساماۋعا شاقىرامىز.
اتالعان اۋماقتاردى مۇمكىندىگىنشە اينالىپ وتۋگە كەڭەس بەرەمىز.
جاياۋ جۇرگىنشىلەردى تروتۋارلارمەن جۇرگەندە ساق بولۋعا شاقىرامىز.