الماتىنىڭ رەسپۋبليكا سارايىندا قالا تۇرعىندارى قىرعىز ادەبيەتىنىڭ دارا تۇلعاسى، كلاسسيك جازۋشى شىڭعىس ايتماتوۆتىڭ 100 جىلدىعىنا ارنالعان ەرەكشە مۋزىكالىق قويىلىمدى تاماشالادى، - دەپ حابارلايدى aqshamnews.kz ءتىلشىسى.
كورەرمەنگە ۇسىنىلعان بۇل تارتۋ - قىرعىزستاننىڭ توقتاعۇل ساتىلعانوۆ اتىنداعى ۇلتتىق فيلارمونياسىنىڭ شىعارماشىلىق ۇجىمى دايىنداعان "ءجاميلا" ميۋزيكلى. وتكەن كوكتەمدە قىرعىزستان ساحناسىندا تۇساۋى كەسىلگەن سپەكتاكل بيىل العاش رەت الماتىلىق اعايىنمەن جۇزدەستى.
كەش شىمىلدىعى مەملەكەتتىك كەڭەسشى ەرلان ءقاريننىڭ قۇتتىقتاۋ سوزىمەن اشىلدى. ول ءوز سوزىندە قازاق پەن قىرعىزدىڭ تامىرلاس، تاعدىرلاس حالىق ەكەنىنە توقتالدى.
"بۇگىن رەسپۋبليكا سارايىندا ءوتىپ جاتقان بۇل ەرەكشە كەش - ەكى ەلدىڭ رۋحاني بايلانىسىن نىعايتاتىن ماڭىزدى وقيعا. پرەزيدەنت اتاپ وتكەندەي، قازاق پەن قىرعىز - باۋىرلاس جۇرت. ءبىزدىڭ بىرلىگىمىز تاريحتا ءىز قالدىرعان ورتاق تۇلعالارمەن، مادەنيەت، ءداستۇر جانە ونەرمەن بەكەمدەلگەن. كەشە وش قالاسىندا اباي مۋزەيىنىڭ اشىلۋى وسىنىڭ ءبىر دالەلى بولسا، بۇگىن مىنە، الماتى ساحناسىندا "ءجاميلا" ميۋزيكلى قويىلىپ وتىر"، - دەدى ەرلان قارين.
قىرعىز رەسپۋبليكاسىنىڭ مەملەكەتتىك حاتشىسى مارات يمانقۇلوۆ تا بۇل پرەمەرانىڭ ەكى حالىقتىڭ دوستىعى مەن ءوزارا قۇرمەتىنىڭ نىشانى ەكەنىن اتاپ ءوتتى.
"شىڭعىس ايتماتوۆتىڭ ەسىمى قىرعىز عانا ەمەس، قازاق مادەنيەتى ءۇشىن دە ايرىقشا قىمبات. ونىڭ شىعارماشىلىعىن العاش بولىپ قولداپ، باعاسىن بەرگەن - قازاق ءسوز ونەرىنىڭ الىپتارىنىڭ ءبىرى مۇحتار اۋەزوۆ. سوندىقتان ءدال وسى ميۋزيكلدىڭ الماتىدا ساحنالانۋىنىڭ ءوزى تەرەڭ مانگە يە"، - دەدى ول.
"ءجاميلا" - ءجاميلا مەن دانياردىڭ نازىك تە ناۋبەتتى ماحاببات تاريحىن سەيىت ەسىمدى جىگىتتىڭ كوزىمەن باياندايتىن شىعارما. جىلدار بويى سان رەجيسسەرگە شابىت بەرگەن بۇل پوۆەست ساحنادا جاڭا تىنىس الىپ، ميۋزيكل جانرىندا قايتا تىرىلگەندەي بولدى. قويىلىمدا ادامدىق قادىر-قاسيەت، بىر-بىرىنە سۇيەۋ بولۋ، رۋحاني بەرىكتىك پەن ءتوزىم يدەيالارى ەرەكشە ايشىقتالادى. بۇل سەزىمدەر كورەرمەنگە تەك اكتەرلەر ويىنى ارقىلى ەمەس، مۋزىكا، ءان مەن بي ارقىلى دا جەتتى.
دانياردىڭ بەينەسىن - قۇرالبەك چوكويەۆ، ءجاميلانى سىرعا ساعىنبەكوۆا سومداپ شىقتى. حورەوگرافيالىق شەشىمدەرگە باس بالەتمەيستەر ەرلان قامىتبەكوۆ جەتەكشىلىك ەتتى. زالعا جينالعان جۇرت ۇلتتىق ناقىشتاعى ءتۇپنۇسقا مۋزىكانىڭ قىرعىز فولكلورىمەن ۇشتاسۋىن، تاريحي كوستيۋمدەر مەن ساحنالىق كوركەمدەۋدىڭ ۇيلەسىمىن تاماشالاي وتىرىپ، كەيىپكەرلەردىڭ ىشكى جان كۇيزەلىسى مەن قۋانىش-قايعىسىن تەرەڭ سەزىنە الدى.
بۇل پرەمەرا كورەرمەنگە رۋحاني سەرپىلىس پەن ەستەتيكالىق ءلاززات سىيلاپ قانا قويعان جوق، مادەنيەتارالىق ديالوگتى جانداندىرىپ، قازاق-قىرعىز بايلانىستارىن جاڭا بەلەسكە كوتەرگەن ماڭىزدى وقيعا رەتىندە ەستە قالدى.
شىڭعىس ايتماتوۆتىڭ ءجۇز جىلدىق مەرەيتويىنا ارنالعان بۇل ميۋزيكل بۇگىندە حالىقارالىق اۋقىمداعى مادەني باستاماعا اينالىپ كەلەدى. الماتىداعى قويىلىمنان كەيىن "ءجاميلا" باكۋ، تاشكەنت، انكارا جانە ەۋروپانىڭ بىرنەشە قالاسىندا ساحنالانۋ جوسپارلانىپ وتىر.