جاسوسپىرىمدەر اراسىنداعى ءدۇبىرلى دودا ەلىمىزدە تۇڭعىش رەت ۇيىمداستىرىلىپ وتىر.
قۇرلىقتىڭ بىرنەشە ەلىنەن كەلگەن 200 دەن اسا سپورتشى ەكى كۇن بويى ءوزارا مىقتىنى انىقتادى. 13 جاسقا دەيىنگى ورەندەر اراسىندا ەرگەش ءامىرحان ەر مىنەز تانىتتى.
ول فينالدا تاجىريبەلى قارسىلاسىن ايقىن باسىمدىلىقپەن ۇتىپ ازيا چەمپيونى اتاندى. سونداي-اق 15 جاسقا دەيىنگى ۇمىتكەرلەر سايىسىندا ەلحان داۋلەتبەك قارسىلاس شىداتپادى. الماتىلىق ميحايل بابايەۆتىڭ دا جەڭىسىن جۇرت كوردى. 8 جاسىنان كاراتەنى سەرىك ەتكەن راۋان امزەبەكتىڭ دە باعى جاندى. جالپى كوماندالىق ەسەپتە جەرلەستەرىمىز توپ جاردى. «حالىقارالىق فەدەراسيا بۇل جارىستى بىزگە ءجايدان-جاي بەرە سالعان جوق. شينكيوكۋشينكايدىڭ قىر-سىرىن از عانا ۋاقىتتا ابدەن مەڭگەرىپ العان قازاق كاراتەشىلەرى الەمدىك جارىستاردا بيىك بەلەستەردى باعىندىرىپ ءجۇر. سوندىقتان ماماندار بىزگە ۇلكەن سەنىم ارتتى، سول سەنىمدى اقتادىق»- دەيدى فەدەراسيا باسشىلارى.
«جارىس وتە جوعارى دەڭگەيدە ءوتتى دەپ نىق سەنىممەن ايتا الامىن. الماتىعا ازيا فەدەراسياسىنىڭ ۆيسە-پرەزيدەنتى جاپونيالىق فۋمياكي ناگاشيما ارنايى كەلىپ وسى جارىستى تاماشالادى. جانە وڭ باعاسىن بەردى. بولاشاقتا الەم بىرىنشىلىگىن ۇيىمداستىرۋدى دا جوسپارلاپ وتىرمىز. ءقازىر قازاقستاندا شينكيكۋشينكايمەن اينالىساتىن سپورتشىلاردىڭ قاتارى جىل سايىن ارتىپ كەلەدى. ەندى الدىمىزدا الەم بىرىنشىلىگى كۇتىپ تۇر. دۇنيەجۇلىىك جارىستا دا ءبىزدىڭ جىگىتتەر جۇلدەلى ورىننان كورىنەدى دەگەن ءۇمىت باسىم»، - دەيدى ق ر شينكيوكۋشينكاي كاراتە فەدەراسياسىنىڭ پرەزيدەنتى بولات باقتايەۆ.