كۇدىكتىلەر ەكى اي مەرزىمگە قاماۋعا الىندى.
قارجى مونيتورينگى اگەنتتىگىنىڭ الماتى قالاسى بويىنشا دەپارتامەنتى الاياقتىق جاسادى دەگەن كۇدىكپەن ءۇش شەتەلدىك ازاماتتى ۇستادى، دەپ حابارلايدى aqshamnews.kz اگەنتتىكتىڭ باسپا ءسوز قىزمەتىنە سىلتەمە جاساپ.
ولار جالعا العان پاتەردە ءتىنتۋ جۇرگىزۋ بارىسىندا التى SIM-بوكس انىقتالىپ، تاركىلەندى.
ەسكە سالايىق، بۇل قۇرىلعىلار الاياقتىق سحەمالاردا كەڭ كولەمدە قوڭىراۋلار جاساۋ، حابارلامالار جىبەرۋ جانە ابونەنتتىك نومىرلەردى وزگەرتۋ ءۇشىن قولدانىلادى.
سونداي-اق، ءارتۇرلى ءموبيلدى وپەراتورلاردىڭ 5 مىڭنان استام SIM-كارتاسى تاركىلەندى.
اتالعان تۇلعالارعا قاتىستى ق ر قىلمىستىك كودەكسىنىڭ 213-بابى 2-بولىگى بويىنشا – "ۇيالى بايلانىس ابونەنتتىك قۇرىلعىسىنىڭ يدەنتيفيكاسيالىق كودىن زاڭسىز قولدانۋ، ابونەنتتى سايكەستەندىرۋ قۇرىلعىسىن زاڭسىز وزگەرتۋ جانە يدەنتيفيكاسيالىق كودتى وزگەرتۋگە ارنالعان باعدارلامالاردى جاساۋ، پايدالانۋ، تاراتۋ" قىلمىستىق ءىس تىركەلدى.
كۇدىكتىلەر ەكى اي مەرزىمگە قاماۋعا الىندى. ولاردىڭ ينتەرنەت-الاياقتىققا قاتىستىلىعى تەكسەرىلۋدە.
تەرگەۋ مۇددەسى ءۇشىن وزگە اقپارات جاريالاۋعا جاتپايدى.