الماتىدا كوپجىلدىق جانە ءبىرجىلدىق ساندىك وسىمدىكتەردى وتىرعىزۋ جۇمىستارى باستالدى. گۇلمەن اسەمدەلەتىن اۋماقتىڭ جالپى كولەمى 159 مىڭ شارشى مەتردى قۇرايدى، ونىڭ ىشىندە 26 مىڭ شارشى مەتر جەر كوگالداندىرىلادى دەپ حابارلايدى almaty-akshamy.kz
قالادا راۋشان، قىزىلكۇرەڭ، كولامبۋس، اببا، لاۆاندا، سالبەن، قازتاماق، گورتەنزيا جانە وزگە دە ساندىك وسىمدىكتەر وتىرعىزىلادى. جول جيەكتەرىنە ءبىرجىلدىق گۇلدەر وتىرعىزىلادى، ماۋسىم ىشىندە گۇلدەپ بولعاننان كەيىن كەلەسى ماۋسىمدا ءوسىپ شىعاتىن گۇل باداندارى قولدانىلادى.
ماماندار بادانالى وسىمدىكتەرمەن قاتار، كوپجىلدىق جانە ءبىرجىلدىق گۇلدەردى دە ەگىلەدى. بۇگىندە كوپجىلدىق وسىمدىكتەردىڭ ۇلەسىن ارتتىرۋ بويىنشا جۇمىستار كەزەڭمەن جۇرگىزىلۋدە، ولاردىڭ قازىرگى ۇلەسى 17%، 2023 جىلى 60%-عا جەتكىزۋ جوسپارلانعان.
گۇلدەر كليماتتىق جاعدايلارعا، كولەمى مەن قالپىنا، گۇلزارلاردىڭ دەكاراتيۆتىگىنە قاراي تاڭدالادى. بيىل كوپجىلدىق گۇلدەردى 15 مامىرعا دەيىن، ءبىرجىلدىق وسىمدىكتەردى 10 ماۋسىمعا دەيىن وتىرعىزادى. ال بادانالى وسىمدىكتەر قازان جانە قاراشا ايلارىندا ەگىلەدى.
بيىل سۋارۋ جۇمىستارىن قالا بويىنشا كۇشەيتۋ جوسپارلانعان. مەملەكەتتىك-جەكە سەرىكتەستىك اياسىندا قالانى ءساندى كوگالداندىرۋ جۇمىستارىنا 400 مامان مەن 50 بىرلىك تەحنيكا جۇمىلدىرىلدى.
