بۇل جوبا قارتتاردى جۇمىسپەن قامتۋعا، ولاردىڭ دامۋىنا جانە ساۋىعۋىنا جاڭا مۇمكىندىكتەر اشۋعا باعىتتالعان.
ناۋرىزباي اۋدانىنداعى «Alma city» تۇرعىن ءۇي كەشەنىنىڭ اۋماعىندا قارتتارعا ارنالعان «سەنىم» دەمالىس ورتالىعىنىڭ سالتاناتتى اشىلۋى ءوتتى، دەپ حابارلايدى اlmaty-akshamy.kz.
«Qazaq Stroy» قۇرىلىس كومپانياسىنىڭ ەرەكشە جوباسىنىڭ تۇساۋكەسەرىنە جينالعان قاۋىمنىڭ قاراسى وتە كوپ بولدى. جينالعان جۇرت «سەنىم» دەمالىس ورتالىعىنىڭ اۋلاسىندا ۇلىستىڭ ۇلى كۇنى ناۋرىز مەرەكەسىن تويلادى. تۇرعىندار قوناقتارعا ارنايى جايىلعان مول داستارحاننان اۋىز ءتيىپ، ناۋرىز كوجەدەن ءدام تاتتى. سونداي-اق، سالتاناتتى شاراعا ارنايى شاقىرىلعان قوناقتاردىڭ ءتالىمدى اڭگىمەلەرىن تىڭداپ، ەسترادا جۇلدىزدارىنىڭ قاتىسۋىمەن وتكەن مەرەكەلىك كونسەرتتى تاماشالادى.
قازاقستان رەسپۋبليكاسى رەسمي تۇردە قارتى كوپ ەلگە جاتادى. ەگدە جاستاعى جاندار حالىقتىڭ 11% قۇرايدى. «ازاماتتارعا ارنالعان ۇكىمەت» كورپوراسياسىنىڭ دەرەگىنە سايكەس الماتى زەينەتكەرلەر سانى بويىنشا الماتى وبلىسى مەن شىعىس قازاقستان وبلىستارىنان كەيىنگى ءۇشىنشى ورىندا ەكەن.
قارتتاردى جۇمىسپەن قامتۋ ەل ازاماتتارىنىڭ ءومىر ءسۇرۋ ساپاسىن ارتتىرۋدا اسا ماڭىزدى ءىس. ادەتتە ۇلكەن ادامدار زەينەتكە شىققانان كەيىن وزدەرىن قوعامعا قاجەتسىز ساناپ، ودان ءارى دامۋىن تەجەيدى. سوندىقتان دا اتا-اجەلەرىمىزدىڭ دەنسۋلىعى دا سىر بەرىپ، وتباسىندا بالا-شاعاسىمەن اراسىندا كەلىسپەشىلىكتەر تۋىندايدى، بۇل قارتتاردىڭ ءومىر ساپاسىنىڭ ناشارلاۋىنا اكەلەدى. ءبىر وتباسىدا ءار ءتۇرلى بۋىن وكىلدەرى ءومىر سۇرگەندىكتەن، ءتۇرلى كوزقاراستاردىڭ بولاتىنى زاڭدىلىق. كەي جاعدايدا جاستار بولەك شىعىپ، اتا-انالارى وزدەرى قالادى، مىنە وسىلايشا جالعىزباستى قارتتاردىڭ سانى ارتىپ، قارىم-قاتىناس تاپشىلىعى مەن الەۋمەتتەنۋ ماسەلەلەرى باستالادى.
بۇل جوبا قارتتاردى جۇمىسپەن قامتۋعا، ولاردىڭ دامۋىنا جانە ساۋىعۋىنا جاڭا مۇمكىندىكتەر اشۋعا باعىتتالعان. سونىمەن قاتار، زەينەت جاسىنجاعى ادامداردىڭ وزدەرى قىزىعاتىن باعىتتاعى سالالاردى تەگىن ۇيرەنۋىنە مۇمكىندىك بەرەدى. «سەنىم» دەمالىس ورتالىعى تۇرعىن ءۇي كەشەنىنىڭ اۋماعىندا ورنالاسقاندىقتان، وسى كەشەندە تۇراتىن قارتتارعا ءۇي اۋماعىنان شىقپاي-اق ۇيىرمەلەرگە بارۋ ىڭعايلى.
«Qazaq Stroy» كومپانياسى ەگدە جاستاعى ادامدار ءۇشىن باسقا دا تۇرعىن ۇيلەردە وسىنداي دەمالىس ورتالىقتارىن ىسكە قوسۋدى جوسپارلاپ وتىر. بۇل زەينەتكە شىققاننان كەيىنگى ءومىردىڭ جاڭا مادەنيەتىن قالىپتاستىرۋعا، زەينەتكەرلەر ءۇشىن جاڭا مۇمكىندىكتەر اشۋعا، سول ارقىلى ءومىر ساپاسىن جاقسارتۋعا جانە كۇردەلى الەۋمەتتىك ماسەلەلەرىن ازايتۋعا جول اشادى.
«سەنىم» دەمالىس ورتالىعىنىڭ اشىلۋىنا، زىلتەمىر كوتەرۋ جانە بىتىمگە تارتۋدان ازيا مەن قازاقستاننىڭ قازىرگى چەمپيونى 76 جاستاعى كازانسيەۆا سۆەتلانا يۆانوۆنا جانە وتكەن جىلى اۋەسقويلار مەن ارداگەرلەر اراسىنداعى قازاقستان چەمپيوناتىندا جۇزۋدەن ەكى بىردەي مەدال جەڭىپ الىپ، سەنساسياعا اينالعان 61 جاستاعى مۇمكىندىگى شەكتەۋلى چاكەر سماعۇلوۆ قاتىستى. سونداي-اق «ارۋجانمەن بوي سەرگىتۋ جاتتىعۋلارى» سپورتتىق باعدارلاماسىنىڭ تۇراقتى جۇرگىزۋشىسى جانە «مەيىرىمدىلىك» قايىرىمدىلىق قورىنىڭ نەگىزىن قالاۋشى ارۋجان ساين، بوديبيلدينگتەن ەۋروپا، ازيا جانە قازاقستان الەم چەمپيونى، بەلگىلى قوعام قايراتكەرى جانە ءىرى سپورتتىق ءىس-شارالاردىڭ يدەيالىق شابىتتاندىرۋشىسى ءۋاليحان تەن قاتىستى.
چاكەر سماعۇلوۆ، 61 جاستاعى مۇمكىندىگى شەكتەۋلى سپورتشى:
سپورتتىڭ ارقاسىندا دەرتتى جەڭدىم
- مەن 2013 جىلدان بەرى ءجۇزۋ سپورتىمەن اينالىسىپ كەلەمىن. جەتكەن جەتىستىكتەرىم دە از ەمەس. جۇزۋدەن قازاقستاننىڭ بەس دۇركىن چەمپيونى، الماتى وبلىسىنىڭ ون دۇركىن چەمپيونى بولدىم، جۇزۋدەن سپورت شەبەرىمىن. سپورت مەنىڭ دەنساۋلىعىمنىڭ مىقتى بولۋىنا سەپتىگىن تيگىزدى. وسىدان بىرنەشە جىل بۇرىن كوۆيدپەن اۋىردىم. سول كەزدە سپورتتىق جاتتىعۋلار ارقىلى ەمدەلدىم، جۇرەگىم سىر بەرگەن كەزدە دە سپورتتىڭ ارقاسىندا دەرتتى جەڭدىم. سوندىقتان قانشا جاسقا كەلسە دە ادام سپورتپەن اينالىسۋى كەرەك دەپ سانايمىن. دەنى ساۋ ادامنىڭ جانى دا تىنىش.
«سەنىم» دەمالىس ورتالىعىندا يوگا ساۋىقتىرۋ جۇيەسى، بيليارد، ۇستەل تەننيسى، فيتنەس باعدارلاما، شاحمات، دويبى، دومينو، توعىز قۇمالاق، ۆوكال ستۋدياسى، كاراوكە، حور، مۋزىكالىق-تەاتر ۇيىرمەسى، اكتەرلىك شەبەرلىككە ۇيرەتۋ، كومپيۋتەرلىك ساۋاتتىلىق جانە الەۋمەتتىك جەلى، وتباسى پسيحولوگياسى، مەنتالدى قابىلەتتىلىك سەكىلدى ۇيىرمەلەر جۇمىس ىستەيدى. ورتالىق باسشىسى گۇلجان نۇرتايەۆانىڭ ايتۋىنشا، بولاشاقتا بۇل باعدارلاما حالىقتىڭ سۇرانىسى مەن ۇسىنىسىنا وراي كەڭەيەتىن بولادى.