الماتىدا سەمسەرلەسۋدەن الەم كۋبوگى وتەدى

14-16 اقپان ارالىعىندا الماتىدا سەمسەرلەسۋدەن جاسوسپىرىمدەر اراسىندا الەم كۋبوگى وتەدى، دەپ حابارلايدى Aqshamnews.kz

جارىسقا ازيا قۇرلىعىنىڭ جانە الەمنىڭ 14 ەلىنەن: جۇڭگو، ءۇندىستان، وزبەكستان، وڭتۇستىك كورەيا، برازيليا، نيگەريا، گونكونگ، تۇركيا، يزرايل، بولگاريا، بەلارۋس جانە قازاقستاننان 100-دەن استام سپورتشى قاتىسادى.

الەم كۋبوگى قازاقستان ۇلتتىق سەمسەرلەسۋ فەدەراسياسىنىڭ الەمدىك ارەناداعى بەدەلىن نىعايتۋدىڭ تاعى ءبىر كەزەڭى بولماق. 2022 جىلى الماتىدا العاش رەت جاسوسپىرىمدەر اراسىنداعى قىلىشتان الەم كۋبوگى ءوتتى، ول حالىقارالىق سەمسەرلەسۋ فەدەراسياسىنىڭ (FIE) جوعارى باعاسىنا يە بولدى. 2023 جىلى قازاقستاندا 300-دەن استام سپورتشىنىڭ باسىن قوسقان 23 جاسقا دەيىنگى ازيا چەمپيوناتى ءوتتى. بيىل الماتى تاعى دا جاسوسپىرىمدەر اراسىنداعى الەم كۋبوگىن وتكىزۋگە مۇمكىندىك الدى، ءبىراق ەندى ەكى كاتەگوريا بويىنشا – ۇلدار مەن قىزدار اراسىندا. جارىس جەكە جانە كوماندالىق ەسەپتە وتەدى، ال قاتىسۋشىلار ءۇشىن تۋرنير اعىمداعى جىلعى ازيا جانە الەم چەمپيوناتتارىنا دايىندىقتىڭ سوڭعى كەزەڭى بولادى.

جارىستىڭ ماقساتى مەن مىندەتتەرى:

• قازاقستان رەسپۋبليكاسىندا سەمسەرلەسۋدى تانىمال ەتۋ؛

• ازيا قۇرلىعىندا دا، بۇكىل الەمدە دە قازاقستاندىق سەمسەرلەسۋدىڭ بەدەلىن نىعايتۋ؛

• سپورتشىلاردىڭ سپورتتىق شەبەرلىگىن ارتتىرۋ؛

• جاتتىقتىرۋشىلار مەن تورەشىلەردىڭ كاسىبي بىلىكتىلىگىن ارتتىرۋ.