سوڭعى ەكى اپتادا ۆيرۋستىڭ بالالار مەن جاستارعا باعىتتالعاندىعى بايقالادى.
الماتى قالاسىنىڭ باس سانيتارلىق دارىگەرى جانداربەك بەكشين وڭىرلىك كوممۋنيكاسيالار قىزمەتىندە وتكەن بريفينگتە ەپيدزەرتتەۋ ناتيجەلەرى بويىنشا كوروناۆيرۋستى جۇقتىرۋدىڭ نەگىزگى ورىندارى انىقتالعانىن حابارلادى. بۇل تىزىمدەگى 40%-دى ساۋدا نىساندارى قۇرايدى،دەپ حابارلادى Almaty-akshamy.kz
«بازارلاردا ناۋقاستاردىڭ 16%-ى جۇقتىرادى، ينفەكسيانىڭ 19%-ى وتباسىلارداعى بايلانىستاردىڭ ناتيجەسىندە پايدا بولدى. ۇيگە ينفەكسيا اكەلگەن ادامدار "ءۇي وشاقتارى" دەپ اتالادى، بالالارعا دا، ەرەسەكووو تۋىستارىنا دا جۇقتىرادى. مەن جىل باسىندا بالالار اراسىندا اۋرۋدىڭ ءوسۋى تۋرالى ايتقانمىن، ءبىراق كوبىسى كۇمانمەن قارادى. ەگەر وتكەن جىلى بارلىعى 280 وقۋشى اۋىرسا، بيىل 5 700 بالا اۋىردى. بيىل 1 جاسقا دەيىنگى بالالاردى جۇقتىرۋدىڭ 200-گە جۋىق جاعدايى تىركەلدى. وتكەن جىلى بۇل جەكە جاعداي بولدى»، – دەدى جانداربەك بەكشين.
باس سانيتارلىق دارىگەر اتا-انالارعا بالالارىن قورعاۋدى، ادام كوپ جينالاتىن جەرلەرگە بارماۋدى ۇسىندى. 5 جاستان اسقان بالالارعا بەتپەردە تاعۋ كەرەك.
جانداربەك بەكشيننىڭ ايتۋىنشا، سوڭعى ەكى اپتادا ۆيرۋستىڭ بالالار مەن جاستارعا باعىتتالعاندىعى بايقالادى. 14 جاسقا دەيىنگى بالالاردىڭ ۇلەس سالماعى 1%-عا ءوستى جانە جوعارى دەڭگەيى 14% قۇرايدى. 40 پەن 59 جاستاعى ناۋقاستانعان ازاماتتاردىڭ ۇلەس سالماعى دا 25%-دى جوعارى دەڭگەيدە.
الماتىنىڭ باس سانيتارلىق دارىگەرى قالانىڭ 2 500-دەن استام نىسانىندا ەنگىزىلگەن Ashyq جۇيەسىنىڭ تيىمدىلىگىن ايتتى.
«بۇل جۇيە بەلگىلى ءبىر ناتيجە بەرەدى. جۇيە ورناتىلعان نىساندارعا بارعىسى كەلگەن تۇرعىندارعا «قىزىل» نەمەسە «سارى» مارتەبەسىنىڭ اسەرىنەن رۇقسات بەرىلمەگەن»، – دەدى جانداربەك بەكشين.
ەسكە سالساق، الماتىدا كارانتين رەجيمىن بۇزعانى ءۇشىن «قىزىل» مارتەبەسى بار 80 تۇرعىنعا ايىپپۇل سالىندى. كارانتيندى بۇزۋشىلاردىڭ اتى-جوندەرى سانيتارلىق-ەپيدەميولوگيالىق باقىلاۋ دەپارتامەنتىنىڭ رەسمي سايتىندا دا جاريالاندى.