الماتىلىق پوليسەيلەر كوكتەم، جاز مەزگىلدەرىندە قالانىڭ جولدارىندا اپاتتىق جاعداي تۋدىراتىن جەكەلەگەن كولىك تۇرلەرىن باقىلاۋعا كوشتى.
«تاجىريبەدە موتوسيكلدەر مەن موپەدتەردىڭ يەلەرى تىكەلەي اعىندى قوندىرعىلاردى پايدالانۋ دەرەگى كوپ كەزدەسەدى. بۇل اسىرەسە تۇنگى ۋاقىتتا ازاماتتاردىڭ تىنىشتىعىنا اسەر ەتەدى جانە ولار رۇقسات ەتىلمەگەن جارىستاردى، سونداي-اق مانيەۆر جاساۋ جانە جىلدامدىقتى شەكتەۋ ەرەجەلەرىن ورەسكەل بۇزا وتىرىپ، ۇيىمداسپاعان توپتىق قوزعالىستاردى ۇيىمداستىرادى. بۇل قالا تۇرعىندارى مەن باسقا دا جول قوزعالىسىنا قاتىسۋشىلاردىڭ شاعىمدارىن تۋدىرادى. وسىعان بايلانىستى الماتى پوليسياسى بالامالى كولىك تۇرلەرىن جۇرگىزەتىن ادامداردىڭ قۇقىق بۇزۋشىلىقتارىن انىقتاۋ جۇمىستارىن كۇشەيتتى. ءقازىر رەيدتەر جۇرگىزىلىپ جاتىر»، — دەدى الماتى قالالىق پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسى باستىعىنىڭ مىندەتىن اتقارۋشى سەرىك شۋمايەۆ.
ونىڭ مالىمەتىنشە، رەيد بارىسىندا قالا جولدارىندا 168 قۇقىق بۇزۋشىلىقتى انىقتالىپ، 13 ماس جۇرگىزۋشى ۇستالدى. سونىمەن قاتار، 68 موپەد جانە 23 ساموكات جۇرگىزۋشىسى اكىمشىلىك جاۋاپقا تارتىلدى، 38 موپەد ايىپپۇل تۇراعىنا قويىلدى.
«موتوكولىكتەردىڭ قاتىسۋىمەن بولاتىن جول اپاتتارىنىڭ نەگىزگى سەبەپتەرى — بەلگىلەنگەن جىلدامدىقتى ساقتاماۋ، قارسى بەتكە شىعىپ كەتۋ، كوشە قيىلىستارى مەن مانيەۆر جاساۋ ەرەجەلەرىن بۇزۋ جانە ت. ب. وتكەن جىلى موپەدتەردىڭ قاتىسۋىمەن 554 جول اپاتى بولىپ، 541 ادام جاراقات الىپ، 16 ادام قازا تاپقان»، — دەدى سەرىك شۋمايەۆ.
سونداي-اق، وتكەن جىلى الماتىدا ساموكات پەن موپەدتەر 617 جول اپاتىنا سەبەپكەر بولعان.