الماتى قالاسىنداعى №2 بالالار قالالىق كلينيكالىق اۋرۋحاناسىندا تراۆماتولوگ ماماندار سەرەبرالدى سال اۋرۋىنان اياق-قولدارىندا اقاۋ پايدا بولعان بالالارعا قالپىنا كەلتىرۋ ماقساتىندا كوپ دەڭگەيلى وپەراسيالار جاسادى.
بۇل كۇردەلى وتالار اۋرۋحانا بازاسىندا العاش رەت وسى جىلدىڭ تامىز ايىندا رەسەيلىك مەديسينا ورتالىقتارىنىڭ ماماندارىمەن بىرلەسىپ جۇزەگە اسىرىلدى. وپەراسيالار «ميلوسەرديە» ەرىكتى قوعامىنىڭ شاقىرتۋى مەن قارجىلىق قولداۋىنىڭ ارقاسىندا ءوتتى.
قازاقستاندىق حيرۋرگتەر شەتەلدىك ارىپتەستەرىمەن بىرلەسىپ جۇمىس جاساپ، ءبىلىمىن شىڭدادى. ناتيجەسىندە ولار كىشكەنتاي پاسيەنتتەردى ەمدەۋ مەن وڭالتۋ دەڭگەيىن ارتتىرۋعا مۇمكىندىك الدى. بۇل — ەرەكشە قولداۋدى قاجەت ەتەتىن بالالاردى ساپالى مەديسينالىق كومەكپەن قامتاماسىز ەتۋگە ۇلكەن ۇلەس قوسادى.
اۋرۋحانانىڭ ەڭ جاس پاسيەنتى نەبارى 1،5 جاستا. بۇل بۇلدىرشىنگە «وڭ جاق اياعىنىڭ ءتۋابىتتى اقاۋى. وڭ جاق تىزە سۇيەكتەرىنىڭ گيپوپلازياسى» دەگەن دياگنوز قويىلعان. اياقتاعى ەكى سۇيەكتىڭ ورنىنا ءبىر عانا سۇيەك بىتكەندىكتەن، حيرۋرگيالىق وتا جاساماي بۇل ماسەلەنى شەشۋ مۇمكىن بولمادى. وپەراسيانى قازاقستاندىق حيرۋرگتەر ەرلان سادىربالين مەن ۇلجان سولتانبەكوۆا رەسەيلىك ارىپتەسى اندرەي كولسوۆپەن بىرلەسىپ جاسادى. وتا ءساتتى اياقتالىپ، ءبۇلدىرشىننىڭ ومىرىنە ءۇمىت سىيلادى. ايتا كەتۋ كەرەك، وپەراسيا مىندەتتى الەۋمەتتىك مەديسينالىق ساقتاندىرۋ (ءمامس) قاراجاتى ەسەبىنەن جۇزەگە اسىرىلدى.
بۇل وتا اۋىر دياگنوزى بار ءبۇلدىرشىن مەن ونىڭ وتباسىنا قالىپتى ومىرگە جولداما سىيلادى. ءبىراز ۋاقىتتان كەيىن ورناتىلعان العاشقى پروتەز كىشكەنتاي قىزدىڭ اياعىن نىق باسىپ، جاڭا ومىرگە قادام جاساۋىنا مۇمكىندىك بەردى.
تراۆماتولوگيا بولىمشەسىنىڭ مەڭگەرۋشىسى ەرلان ءسادىرباليننىڭ ايتۋىنشا، سەرەبرالدى سال اۋرۋىمەن اۋىراتىن بالالاردى كەشەندى ادىسپەن ەمدەۋ قاجەت. اسىرەسە مۋلتيديسيپلينارلىق ءادىستىڭ ناتيجەسى مول: ورتوپەد، نيەۆرولوگ، رەابيليتولوگ مامانداردىڭ بىرلەسىپ جۇمىس جاساۋى كوپ ناتيجە بەرەدى.
«وتادان كەيىنگى مەديسينالىق وڭالتۋ شارالارى دا بالانىڭ تولىق ايىعۋىندا ماڭىزدى ءرول اتقارادى. سوندىقتان دارىگەرلەر مەن ناۋقاستىڭ اتا-اناسى قويان-قولتىق جۇمىس ىستەۋى قاجەت»، — دەدى دارىگەر.
كەرەك دەرەك
سەرەبرالدى سال اۋرۋى (سسا) — بۇل بالالاردىڭ ورتالىق جۇيكە جۇيەسىنىڭ زاقىمدالۋىنان تۋىندايتىن اۋرۋ، قوزعالىس جانە قيمىل بۇزىلىستارىنا اكەلەدى. ول كوبىنە مي دامۋىنىڭ ەرتە كەزەڭىندە، جۇكتىلىك، بوسانۋ كەزىندە نەمەسە تۋعاننان كەيىنگى كەزەڭدە ورىن العان فاكتورلار اسەرىنەن پايدا بولادى.
سەبەپتەرى:
- جۇكتىلىك كەزىندەگى ينفەكسيالار، توكسيكوز.
- بوسانۋ كەزىندە وتتەگىنىڭ جەتىسپەۋشىلىگى.
- تۋعاننان كەيىنگى ينفەكسيالار نەمەسە جاراقاتتار.
بەلگىلەرى:
- قوزعالىستىڭ بۇزىلۋى، بۇلشىقەتتەردىڭ قاتتى جيىرىلۋى.
- تەپە-تەڭدىك پەن كوورديناسيانىڭ بۇزىلۋى.
- ەرىكسىز، باقىلاۋسىز قيمىلدار.
ەمى:
- دارى-دارمەكتەر، فيزيوتەراپيا، ەڭبەك تەراپياسى.
- حيرۋرگيالىق ەم جانە مۋلتيديسيپلينارلىق قولداۋ.
سسا تولىق ەمدەلمەسە دە، كەشەندى ەمدەۋ مەن وڭالتۋ ارقىلى بالالاردىڭ ءومىر ساپاسىن جاقسارتۋعا بولادى.