اتالمىش شارا Almaty Gallery عيماراتىندا ساعات 11.00-دە باستالادى.
الماتىدا 17 ماۋسىم كۇنى 1920-1950 جىلدارداعى ساياسي قۋعىن-سۇرگىن قۇرباندارىن ەسكە الۋ كۇنىنە ارنالعان «ءبىز» اتتى فوتوكورمە وتەدى، دەپ حابارلايدى Almaty-akshamy.kz.
ءىس-شارانى الماتى قالاسى اكىمدىگى جانىنداعى ساياسي قۋعىن-سۇرگىن قۇرباندارىن تولىق ساياسي جانە زاڭدى اقتاۋ جونىندەگى قالالىق كوميسسيا مەن «Shon» قورى وتكىزەدى.
كورمەنىڭ ماقساتى – قازاق جەرىنە دەپورتاسيالانعان جانە كۇشتەپ قونىس اۋدارىلعان ادامداردىڭ، ياعني جازىقسىز قۋعىن-سۇرگىن قۇرباندارىنىڭ جەكە ىستەرىن زەرتتەۋ پريزماسى نەگىزىندە سول قيىن-قىستاۋ كەزەڭ تاريحىنا ازاماتتاردىڭ قىزىعۋشىلىعىن ارتتىرۋ. ەكسپوزيسيالىق ماتەريالدار رەتىندە قۇقىق قورعاۋ ورگاندارىنا تۇلعانى انىقتاۋ جانە تانۋ ماقساتىندا سول كەزدەگى جەكە ىستەردەن الىنعان قۋعىن-سۇرگىنگە ۇشىراعان ادامداردىڭ مۇراعاتتىق فوتوقۇجاتتارى قابىلدانادى.
ۋاقىت وتە كەلە سارعايعان مۇراعاتتىق قۇجاتتار ءبىزدىڭ ەلىمىز ءۇشىن شىن مانىندە ۇلكەن تاريحي قۇندىلىق بولىپ تابىلاتىن كوپتەگەن فاكتىلەرگە جارىق بەردى.
130-عا جۋىق ەتنيكالىق توپتاردىڭ مادەنيەتتەرى توعىسقان بۇگىنگى قازاقستاننىڭ كۇش-قۋاتى – حالقىنىڭ ىزگى نيەتتەستىگى جانە ونىڭ ءوزارا ىقپالداستىعى ناتيجەسىندە قالىپتاسقان مادەني بايلىعىندا.
ۇلتتىق تاريحىمىزدىڭ قيىن كەزەڭىنە اينالعان ەلىمىزدىڭ وتكەنىنە كوز جۇگىرتە وتىرىپ، ءبىز بۇگىنگى كۇنىمىزدە بار نارسەنى باعالاي ءبىلۋدىڭ، تاۋەلسىز قازاقستاندى ساقتاۋ مەن دامىتۋ ءۇشىن قاتەلىكتەردى قايتالاماۋدىڭ ىشكى قاجەتتىلىگىن كۇشەيتەتىن ماڭىزدى تاجىريبە جيناقتايمىز. ءاربىر ادام بەلگىلى ءبىر مادەنيەتتىڭ وكىلى رەتىندە قازىرگى قازاقستاننىڭ ءبىرتۇتاس جانە قايتالانباس مادەنيەتىن قۇرا وتىرىپ، قوعامنىڭ قالىپتاسۋىنا وزىندىك وشپەس ۇلەسىن قوستى.