بۇگىن الماتى قالاسىنىڭ «اينابۇلاق-2» ىقشاماۋدانىندا Ainabulaq اتتى جاڭا شىنىقتىرۋ-ساۋىقتىرۋ كەشەنىنىڭ سالتاناتتى اشىلۋى ءوتتى. اتالمىش ءىس-شاراعا الماتى اكىمىنىڭ ورىنباسارى ارمان قىرىقبايەۆ جانە قالالىق سپورت باسقارماسىنىڭ باسشىسى ەردەن حايرۋللين قاتىستى. ا.قىرىقبايەۆ اشىلۋ سالتاناتى كەزىندە ءسوز سويلەپ، جەتىسۋ اۋدانىنىڭ تۇرعىندارى مەن سپورتسۇيەر قاۋىم الدىندا جاڭا كەشەننىڭ اشىلۋىنا بايلانىستى جىلى لەبىزىن ءبىلدىردى:
- بارشاڭىزدى الماتى قالاسىنىڭ باسشىسى اتىنان ۇلكەن ۇلتتىق مەرەكە رەسپۋبليكا كۇنىمەن شىن جۇرەكتەن قۇتتىقتايمىز! ءبارى تۇسپا تۇس كەلىپ تۇرعان كۇنى جەتىسۋ اۋدانىندا بيىل جاڭا سپورت كەشەنىنىڭ اشىلۋىندا ەكىنشى رەت باس قوسىپ وتىرمىز. سپورت كەشەنىنە كەلگەن ادامداردىڭ كوپتىگىنە قاراپ، بۇل جەردەگى ۇيىرمەلەر قالا تۇرعىندارى اراسىندا سۇرانىسقا يە ەكەنىنە كوزىمىز جەتتى. ءالى دە ۇلكەن جوسپارلارىمىز بار. 2030-جىلعا دەيىنگى ارالىقتا جىل سايىن كەم دەگەندە 3 سپورت كەشەنىن اشۋدى جوسپارلاپ وتىرمىز. بۇگىنگى بولاتىن سايىستاردا شىن مىقتىلار جەڭىسكە جەتسىن، – دەدى الماتى اكىمىنىڭ ورىنباسارى ارمان قىرىقبايەۆ.
سپورت كەشەنى بالالارعا بۇقارالىق سپورتپەن اينالىسۋعا مۇمكىندىك اشۋ جانە ولاردى سالۋاتتى ءومىر سالتىنا باۋلۋ ماقساتىندا سالىندى. كەشەننىڭ جالپى اۋدانى – 3900 شارشى مەتر. مۇندا ءبىر كۇندە الماتى قالاسى سپورت باسقارماسىنا قاراستى 82 كاسىبي جاتتىقتىرۋشىسىنىڭ باسشىلىعىمەن 17 سپورت تۇرىنەن 900 جاس سپورتشى قاتىسا الادى.
- بۇگىن جاڭا سپورت كەشەنى اشىلىپ جاتىر. بۇل جاستار ءۇشىن وتە ۇلكەن مۇمكىندىك. ولاردى شىڭداپ، وزدەرىن بيىك دەڭگەيدە كورسەتۋگە مۇمكىندىك بەرەتىن ورتالىق. سوندىقتان بارلىعىن سپورتپەن اينالىسۋعا شاقىرامىن، سپورت – دەنساۋلىق كەپىلى، – دەدى قويان-قولتىق ۇرىس تۇرىنەن ۇيىرمە قاتىسۋشىسى شىنار كەنجەبايەۆا.
Ainabulaq شىنىقتىرۋ-ساۋىقتىرۋ كەشەنىندە باسكەتبول، فۋتزال، ۆولەيبول، توعىزقۇمالاق، قازاقشا كۇرەس، سامبو، مۋايتاي جانە كيكبوكسينگ سەكسيالارى مەن وزگە دە سپورت تۇرلەرى بويىنشا ۇيىرمەلەر اشىلادى. ايتا كەتكەن ءجون، بۇل سپورت كەشەنى تەك وقۋ-جاتتىعۋ پروسەسىنە عانا ەمەس، سونىمەن قاتار قالالىق جانە رەسپۋبليكالىق تۋرنيرلەردى ۇيىمداستىرۋعا جانە وتكىزۋگە ارنالعان.
سالتاناتتى اشىلۋ سالتاناتىنان كەيىن بوز كىلەمدە ءارتۇرلى سپورت شەبەرلەرى ءوز ونەرلەرىن كورسەتتى. سونداي-اق، سپورت ۇيىرمەلەرىنىڭ وكىلدەرى بارلىق نيەت بىلدىرگەن بالالاردى جازىپ الىپ، قابىلداۋ جۇرگىزدى.