الماتى اكىمى ەربولات دوسايەۆ جۇمىس ساپارى بارىسىندا بوستاندىق اۋدانى كوكتەم-1 شاعىن اۋدانىنداعى جوندەۋدەن وتكەن №138 مەكتەپتى كورىپ شىقتى، دەپ حابارلايدى aqshamnews.kz پورتالى.
1989 جىلى سالىنعان عيماراتتىڭ كونسترۋكسياسىنىڭ سەنىمدىلىگىن تەحنيكالىق تەكسەرۋ ناتيجەسىندە قالا اكىمى مەكتەپتى سەيسميكالىق نىعايتۋ مەن كۇردەلى جوندەۋدەن وتكىزۋ جونىندە تاپسىرما بەردى.
مەردىگەرلىك ۇيىمنىڭ جۇمىسى 2023 جىلدىڭ جەلتوقسانىندا باستالىپ، بيىل قازان ايىنىڭ سوڭىندا اياقتالدى. رەكونسترۋكسيا جوباسىندا عيماراتتىڭ جۇكتەمەنى كوتەرۋشى قۇرىلىمىن نىعايتۋعا ەرەكشە كوڭىل ءبولىندى. جوبادا قاسبەت پەن شاتىردى جوندەۋ، ينجەنەرلىك جۇيەلەردى اۋىستىرۋ جانە عيماراتتىڭ ىشكى ارلەۋى قاراستىرىلعان.
وقۋ ورنى بيولوگيا، روبوتوتەحنيكا، ينفورماتيكا، حيميا پاندەرىنە ارنالعان ينتەراكتيۆتى تاقتالار مەن پلانشەتتەرمەن جابدىقتالعان كابينەتتەرمەن قامتىلعان. سونىمەن قاتار، زاماناۋي ستاندارتتارعا سايكەس ەكى سپورت جانە اكت زالى جابدىقتالعان. فۋتبول الاڭى مەن سپورت الاڭى جاڭارتىلدى. مەكتەپتە قاۋىپسىزدىكتى قامتاماسىز ەتۋ ماقساتىندا بەينەباقىلاۋ كامەرالارى مەن بەت-الپەتتى تانۋ مۇمكىندىگى بار تۋرنيكەتتەر ورناتىلعان. مەكتەپتە 797 بالا مەملەكەتتىك تىلدە وقيتىن بولادى.
ەربولات دوسايەۆ ءبىلىم باسقارماسىنىڭ باسشىسى مەن مەكتەپ اكىمشىلىگىنە مەكتەپتى II توقساننىڭ باسىنا دەيىن Kitap.kz سيفرلىق كىتاپحاناسىنا قوسۋ جونىندە تاپسىرما بەردى. بۇل كىتاپحانا وقۋشىلارعا ەلەكتروندى جانە اۋديو فورماتتاعى 6000-نان استام كوركەم ادەبيەت شىعارماسىنا قولجەتىمدىلىكتى قامتاماسىز ەتەدى. سونىمەن قاتار، اۋدان اكىمدىگىنە مەكتەپكە جاقىن اۋماقتىڭ سانيتارلىق جاعدايىن قامتاماسىز ەتۋ جۇكتەلدى.
ايتا كەتۋ كەرەك، وقۋشىلاردىڭ ورنى تاپشىلىعىن قىسقارتۋ ماقساتىندا قالادا بۇگىنگى تاڭدا زەردەلى شاعىن اۋدانىندا 550 ورىندىق مەكتەپ، ءارتۇرلى اۋدانداردا 5 قوسىمشا قۇرىلىس، سونداي-اق 6 مەكتەپتىڭ كۇردەلى جوندەۋى مەن رەكونسترۋكسياسى جۇرگىزىلۋدە. بۇعان قوسا، مەگاپوليستە «جايلى مەكتەپ» ۇلتتىق جوباسى بويىنشا 21 نىساننىڭ قۇرىلىسىن جۇرگىزۋ جالعاسۋدا. ەسكە سالساق، قالاداعى العاشقى «جايلى مەكتەپ» بيىل قىركۇيەك ايىندا اشىلدى.