الماتىداعى رەسپۋبليكا سارايىندا رەسپۋبليكا كۇنىنە ارنالعان مەرەكەلىك كونسەرت ءوتتى، دەپ حابارلايدى Almaty-akshamy.kz
ءىس-شارا ق ر مەملەكەتتىك تۋىن ساحناعا الىپ شىعۋدان جانە قۇرمانعازى اتىنداعى حالىق اسپاپتار وركەسترى مەن الماتى قالاسى اكىمىنىڭ «ALL Jazz Symphony» ەسترادالىق-سيمفونيالىق وركەسترىنىڭ سۇيەمەلدەۋىمەن بايقاداموۆ اتىنداعى حور كاپەللاسىنىڭ مەملەكەتتىك ءانۇراندى ورىنداۋىنان باستالدى.
ءىس-شاراعا الماتى اكىمى ەربولات دوسايەۆ، قوعام قايراتكەرلەرى، ءماسليحات دەپۋتاتتارى، قالانىڭ شىعارماشىلىق زيالىلارى جانە ت.ب. قاتىستى.
كونسەرتكە ايگۇل ۇلكەنبايەۆا، «اسىل» كۆارتەتى، «ArtEast» ارت-بالەتى، «بوزتورعاي» بالالار حورى، ءابىلقايىر جۇماباي، السۋ ۇلۋحانوۆا، دينايا، رۋحيا بايدۋكەنوۆا، «Mezzo» توبى، «تەررا»، «سالتانات» بي ۇجىمدارى، «جەتىسۋ» مەكتەبىنىڭ سوليستەرى ءمادينا شاريپوۆا، مۇراتحان دياس، ءۇمىت جولدىباي قىزى، ەرلان رىسقالي، ءالي وقاپوۆ، دينارا سۇلتان، لۋينا، نۇرلان ابدۋلين، Jeltoksan جانە The Buhars، ءجانيا اۋباكىروۆا، «Adagio» دۋەتى، نۇربولات ابدۋللين، قازىبەك قۇرايىش، اييا ءشارىپ جانە ەسجان اسەت قاتىستى.
پاتريوتتىق اندەر شىرقالىپ، ساحنادا وتانعا دەگەن سۇيىسپەنشىلىكتى بەينەلەيتىن بي جانە شىعارماشىلىق نومىرلەر قويىلدى. كونسەرت «مەن سەنى سۇيەمىن قازاقستان» كومپوزيسياسىن بارلىق قاتىسۋشىنىڭ ورىنداۋىمەن اياقتالدى.
بۇعان قوسا، قالا مەن اۋدانداردا رەسپۋبليكا كۇنى باسقا دا ءبىرقاتار ءىس-شارا ۇيىمداستىرىلعانىن ەسكە سالامىز:
- جىبەك جولى داڭعىلىندا، پانفيلوۆ پەن بايسەيىتوۆا كوشەلەرىنىڭ اراسىندا ساعات 10:00-دەن 18:00-گە دەيىن قولونەرشىلەر جارمەڭكەسى وتەدى. جارمەڭكەدە قازاقستان، وزبەكستان جانە قىرعىزستان شەبەرلەرىنىڭ قولدان جاسالعان قولونەر جۇمىستارى ۇسىنىلادى.
- 10:00-دەن 18:00-گە دەيىن سپورتتىق-جاتتىعۋ كەشەنىندە شاعىن فۋتبول، ۆولەيبول جانە دزيۋدودان، سونىمەن قاتار، ءال-فارابي اتىنداعى قازۇۋ-دا ۇستەل تەننيسى جانە قازاق كۇرەسىنەن سپورتتىق فەستيۆال وتەدى.
- ساعات 10:30-دا «مەدەۋ» بتسك-دا مەملەكەتتىك تۋ كوتەرىلىپ، قازاقستان ءانۇرانى ورىندالادى. ءىس-شاراعا قالا جاستارى، قوعام قايراتكەرلەرى، الماتى قالاسى ءماسليحاتىنىڭ دەپۋتاتتارى جانە قازاقستان حالقى اسسامبلەياسىنىڭ وكىلدەرى قاتىسادى. سونىمەن قاتار، قالانىڭ بارلىق اۋدانىندا مەملەكەتتىك تۋ كوتەرىلىپ، قازاقستاننىڭ ءانۇرانى ورىندالادى.
- جەتىسۋ اۋدانىندا 25 قازان كۇنى ساعات 11:00-دە سەرىكوۆ كوشەسى، 2ا مەكەنجايىنداعى «گۇلدەر» ساياباعىندا «جاس تاۋەلسىز قازاقستان» اتتى مەرەكەلىك كونسەرت وتەدى.
- ساعات 11:00-دە جامبىل اتىنداعى قالالىق جاسوسپىرىمدەر كىتاپحاناسىندا «ەل وركەنىن وسىرگەن ازاتتىق» تاقىرىبىندا كۆيز جانە «دەكلاراسيا-تاۋەلسىزدىكتى بەكىتۋدىڭ العاشقى قادامى» كورمەسى وتەدى.
- ساعات 12:00-دە «Alatau creative hub» اۋماعىندا «ەلىم مەنىڭ» مەرەكەلىك كونسەرتى وتەدى.
- اۋەزوۆ اۋدانىندا 25 قازان كۇنى ساعات 12:00-دە Family park دەمالىس ساياباعىندا «رەسپۋبليكا كۇنىنە ارناۋ» اتتى كونسەرتتىك ءىس-شارا وتەدى.
- ساعات 14:00-دە كوك-توبە ساياباعىندا «الماتى اۋەندەرى» شىعارماشىلىق ۇجىمدارىنىڭ قاتىسۋىمەن «جاساي بەر ماڭگى – قازاقستان» اتتى مەرەكەلىك كونسەرت وتەدى.
- بالۋان شولاق اتىنداعى سپورت سارايىندا 15:00-دەن 18:00-گە دەيىن قازاقستاندىق ەسترادا جۇلدىزدارىنىڭ قاتىسۋىمەن قازاق كۇرەسىنەن «ونەر بارىسى» ءتۋرنيرى وتەدى.
- ساعات 16:00-دە قازاق مەملەكەتتىك سيركىندە رەسپۋبليكا كۇنىنە جانە سيرك ءارتىسىنىڭ 70 جىلدىعىنا وراي اتاقتى كلوۋن جانە سيقىرشى كارىم مۇتىرعانوۆتىڭ بەنەفيسى ۇيىمداستىرىلادى. اكروباتتار، اۋە گيمناستتارى، جونگلەرلەر، ەكۆيليبريستەر، يلليۋزيونيستەر مەن سايقىمازاقتار شوۋ-باعدارلاما كورسەتەدى.