حقكو-دا ءبىر كۇندە شەتەلدىكتەردىڭ 3-3،5 مىڭ ءوتىنىمى قارالادى.
الماتىدا شەتەلدىك ازاماتتارعا جسن بەرۋ ءۇشىن اشىلعان ارنايى حقكو-دا ۇزىن-سونار كەزەك پايدا بولدى، - دەپ حابارلايدى Almaty-akshamy.kz
الەۋمەتتىك جەلىدە حقكو-لاردىڭ بىرىنە جسن الۋعا كەلگەن رەسەي ازاماتتارى جينالعان ۇزىن-سونار كەزەك ۆيدەوسى پايدا بولدى.
«ازاماتتارعا ارنالعان ۇكىمەت» كەاق الماتى بويىنشا فيليالىنىڭ باسپا ءسوز قىزمەتى مالىمەتىنشە، كەزەك شىنىمەن بار، ءبىراق بۇل ماسەلە شەشىلىپ جاتىر جانە رەسەي فەدەراسياسى ازاماتتارى 2-3 مينۋت ىشىندە قىزمەت الىپ جاتىر. بۇل رەتتە رەسەيلىكتەر كەزەگى جەتىسۋ اۋدانى، قۇلاگەر شاعىناۋدانى، قازىبايەۆ كوشەسى، 286 ۆ مەكەنجايى بويىنشا قۇلاگەر شاعىناۋدانىنداعى فوك (سپورتتىق-ساۋىقتىرۋ كەشەنى) عيماراتىندا ارنايى ۇيىمداستىرىلعان ءبىر عانا حقكو-دا بايقالادى.
«ولار ەشكىمگە كەدەرگى جاسامايدى. بۇل جۇمىسى كۇشەيتىلگەن حالىققا قىزمەت كورسەتۋ ورتالىعى. وندا الدىمەن 20 جۇمىس ورنى بولىنگەن، ءقازىر 40 قىزمەتكەر قىزمەت كورسەتىپ جاتىر. رەسەيلىكتەرگە كوشى-قون قىزمەتىنىڭ قىزمەتكەرلەرى دە كەڭەس بەرىپ جاتىر»، - دەدى باسپا ءسوز قىزمەتى وكىلدەرى.
حقكو-دا ءبىر كۇندە شەتەلدىكتەردىڭ 3-3،5 مىڭ ءوتىنىمى قارالادى. بۇل ادەتتەگى جۇكتەمەدەن 50 پايىزعا ارتىق. قىزمەتكەرلەر 09:00-دەن 20:00-گە دەيىن، تالون العان سوڭعى كليەنتكە دەيىن جۇمىس ىستەيدى. كليەنتتەرگە ىڭعايلى بولۋ ءۇشىن حقكو-عا اۋىز سۋ اكەلىنەدى جانە شەتەلدىك ازاماتتاردىڭ تۇندە قالاتىن جەرى بولماعان جاعدايدا ورىندار بەرىلەدى.