الماتىدا «قىزعالداقتار گۇلدەگەندە» كورمە-جارمەڭكەسى ءوتتى

الماتىداعى ورتالىق مۋزەيدە ورتالىق ازيا قولونەر شەبەرلەرىنىڭ «قىزعالداقتار گۇلدەگەندە» دەپ اتالاتىن كورمە-جارمەڭكەسى اشىلدى.

ءىس-شاراعا ەلىمىزدىڭ جانە قىرعىزستان، وزبەكستان، تۇركىمەنستاننان كەلگەن شەبەرلەر مەن سۋرەتشىلەر جانە ديزاينەرلەر قاتىسىپ جاتىر، دەپ حابارلايدى Almaty-akshamy.kz 24.kz-كە سىلتەمە جاساپ.

جارمەڭكەگە ەتنوستيلدەگى جاڭا كيىم ۇلگىلەرى مەن زەرگەرلىك بۇيىمدار، كەراميكا، مەتالل، كيىز بەن جىبەكتەن جاسالعان، ءارتۇرلى زاتتار جانە سۋرەتشىلەردىڭ كارتينالارى قويىلعان. ماقسات - كورشىلەس ەلدەر اراسىنداعى مادەني بايلانىستى نىعايتۋ. جارمەڭكەگە قىش ونەرىنىڭ ھاس شەبەرى مارات سارسەبايەۆ تا  كەلىپتى. ونىڭ جۇبايى قازاقتىڭ ۇلتتىق كيىمدەرىن كيگەن قۋىرشاقتارىن جاساسا، وتاعاسى سىعاناق پەن وتىراردان، تارازدان تابىلعان كونە دۇنيەلەردىڭ كوشىرمەسىن اكەلىپتى. 

«ەرتە زاماننان باستاپ ءوزىمىزدىڭ دە وسىنداي ۇلكەن  مادەنيەت بولعانىن، مادەني دۇنيەلەردىڭ كوپ بولعانىن حالىققا كورسەتۋ، حالىققا تانىستىرۋ كەرەك. مىنە، مىسالعا مىنا دۇنيەلەر - مىناۋ ەندى وتىراردان شىققان دۇنيەلەر. ەندى سونىڭ تەحنولوگيالارىن جاساپ كورسەتۋگە سونداي ءبىر تىرىسۋ بولدى مەندە. ءبىر جاعىنان، ءوزىڭنىڭ دە ويلاعان دۇنيەلەرىڭ بار. سونداي-سونداي زاتتاردى اقىرىنداپ، اقىرىنداپ حالىققا كورسەتۋ - ماقساتىمىز. مىنە، تازا گلازۋر، تازا دۇنيە»، - دەيدى قىش شەبەرى مارات سارسەبايەۆ.