ورتەنگەن ءۇي ىشىندە قامالىپ قالعان ءجاسوسپىرىم قۇتقارىلدى
الماتى قالالىق توتەنشە جاعدايلار دەپارتامەنتىنىڭ مالىمەتىنشە، ءورت جەتىسۋ اۋدانى ۆەنەسيانوۆ كوشەسىندە ورنالاسقان №65 ۇيدەن شىققان. وقيعا ورنىنا ءورت ءسوندىرۋ جاساقتارى جوعارى دارەجەدەگى شاقىرتۋ بويىنشا جىبەرىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مامانداندىرىلعان جاساق بولىمشەلەرى وقيعا ورنىنا ءتورت مينۋتتا جەتتى. قۇتقارۋشىلار جالپى الاڭى 80 شارشى مەتر بولاتىن شاتىرى بار ءۇيدىڭ ورتەنىپ جاتقانىن انىقتادى»، - دەپ حابارلادى ۆەدومستۆودان.
ءورتتى بارلاۋ جانە ءسوندىرۋ بارىسىندا مامانداندىرىلعان جاساق جانە №8 ءورت ءسوندىرۋ ءبولىمىنىڭ ماماندارى ءۇيدىڭ ىشىنەن 2008 جىلى تۋعان قىزدى تاپتى.
«ول تۇرعىن ۇيگە جاپسارلاس سالىنعان بولمەدە قامالىپ قالعان. شىعاتىن جول جابىق. تەرەزەسى مەتالل تورمەن جابىلعان. قۇتقارۋشىلار ەسىكتى اشىپ، وقۋشى قىزدى سىرتقا شىعاردى. ءجاسوسپىرىمدى دارىگەرلەر تەكسەردى، ومىرىنە ەشقانداي ءقاۋىپ جوق»، - دەپ اتاپ ءوتتى دەپارتامەنتتەن.
ءورتتى سوندىرۋگە 9 تەحنيكا، جەكە قۇرامنان 36 ادام جۇمىلدىرىلدى.