3-4 قازان ارالىعىندا الماتىدا قۇرمانعازى اتىنداعى قازاق ۇلتتىق حالىق وركەسترىنىڭ 90 جىلدىعىنا ارنالعان مەرەيتويلىق ءىس-شارالار وتەدى. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وركەستر ديرەكتورى مەدەت قۋانىشيەۆ مالىمدەدى، - دەپ حابارلايدى aqshamnews.kz.
سپيكەردىڭ ايتۋىنشا، مەرەكەلىك ءىس-شارالارعا كورشى ەلدەردىڭ حالىق ارتىستەرى ارنايى شاقىرىلعان، ولار وسىنداي ماڭىزدى كۇندى اتاپ وتۋگە ءوز ۇلەستەرىن قوسادى.
«بۇل تەك قۇرمانعازى اتىنداعى قازاق ۇلتتىق حالىق وركەسترىنىڭ عانا ەمەس، جالپى قازاق ونەرىنىڭ مەرەيتويى. كوپتەن كۇتكەن ۇلى توي الماتى قالاسىنداعى قۇرمانعازى وركەستىرىنىڭ عيماراتىندا 3-4 قازان ارالىعىندا تويلاناتىن بولادى. كەشكە وزبەكستان رەسپۋبليكاسىنىڭ حالىق ءارتىسى فارۋح سادىقوۆ پەن قىرعىزستان رەسپۋبليكاسىنىڭ حالىق ءارتىسى باقىت تىلەگەن ارنايى شاقىرتۋمەن كەلەدى. سونداي-اق، نۇرجامال ۇسەنبايەۆا، تالعات كۇزەمبايەۆ جانە ايگۇل كەنبايەۆا سياقتى ەلىمىزدىڭ حالىق ارتىستەرى ونەر كورسەتەدى»، - دەدى مەدەت قۋانىشيەۆ.
قالامىزدىڭ قوناعى، وزبەكستان رەسپۋبليكاسىنىڭ حالىق ءارتىسى فارۋح سادىقوۆ قازاقستان مەن وزبەكستاننىڭ مۋزىكالىق ۇجىمدارى اراسىنداعى ىنتىماقتاستىق ءداستۇرلى مۋزىكانىڭ دامۋىنا قالاي اسەر ەتەتىندىگى تۋرالى ايتتى.
«ەڭ الدىمەن، قازاق باۋىرلارىمدى بۇگىنگى مەرەكەسىمەن قۇتتىقتايمىن. شاقىرتۋعا راحمەت، وسىنداي تاجىريبە الماسۋ ادىستەرى ۇجىمدى بايىتادى. ءبىز قازاق-وزبەك ونەرىنىڭ ۇجىمى بىر-بىرىمىزگە كومەكتەسىپ، تولىقتىرىپ وتىرامىز. باستىسى - شىعارماشىلىق دوستىعىمىزدى ساقتاپ قالۋ. «دوس بولۋ وڭاي، ال دوستىقتى ساقتاۋ قيىن» دەيدى، ال ءبىزدىڭ شىعارماشىلىق دوستىعىمىز 40 جىلدان استام ۋاقىت بويى ساقتالىپ كەلەدى»، - دەدى فارۋح سادىقوۆ.
بريفينگكە وركەستردىڭ باس ديريجەرى ابىلاي تىلەپبەرگەن دە قاتىستى. ول ۇجىم جۇمىسىنىڭ ماڭىزدى اسپەكتىسى ءداستۇرلى قازاق مۋزىكاسى مەن زاماناۋي مۋزىكالىق ۇردىستەر اراسىنداعى تەپە-تەڭدىكتى ىزدەۋ ەكەنىن اتاپ ءوتتى. ونىڭ ايتۋىنشا، وركەستر كلاسسيكالىق شىعارمالاردىڭ جاڭا تۇسىندىرمەلەرىن ىزدەيدى، بۇل ولاردىڭ وزەكتىلىگىن ساقتاۋعا جانە تىڭداۋشىلاردىڭ جاڭا بۋىنىنىڭ نازارىن اۋدارۋعا كومەكتەسەدى.
وركەستردىڭ مەرەيتويىنا ارنالعان سالتاناتتى ءىس-شارالار «ءىنجۋ-مارجان» دەگەن اتاۋمەن 2024 جىلعى 3 قازاندا باستالادى، ال 4 قازاندا قازاقستاننىڭ ءتۇرلى وڭىرلەرىنەن كەلگەن وركەسترلەردىڭ باس ديريجەرلەرىنىڭ قاتىسۋىمەن «ديريجەرلەر شەرۋى» وتەدى.
مەرەيتويلىق باعدارلاما اياسىندا وركەستردىڭ قالىپتاسۋ تاريحىن، ونىڭ ىشىندە قازاق مۋزىكاسىنىڭ دامۋىندا ماڭىزدى ءرول اتقارعان بەلگىلى كۇيشىلەر مەن كومپوزيتورلاردىڭ دومبىرالارىن بەينەلەيتىن قۇندى جادىگەرلەردىڭ جىلجىمالى كورمەسى ۇيىمداستىرىلادى.