الماتىدا ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ دوكتورانتۋراسى مەن ماگيستراتۋراسىنا قۇجات قابىلداۋ باستالدى. وڭىرلىك كوممۋنيكاسيالار قىزمەتىندە وتكەن پرەسس-كونفەرەنسيادا اكادەميانىڭ الماتىلىق بولىمشەسىنىڭ ديرەكتورى اينۋر يدريسوۆا وقۋعا تۇسەردە قانداي قۇجات قاجەت ەكەنىن، ونىڭ ەرەجەسى مەن جاڭالىعى جونىندە ايتىپ بەردى، دەپ حابارلايدى aqshamnews.kz
2025 جىلى وقۋعا تۇسەتىندەردى جاڭا تالاپ، جاڭارعان ءبىلىم باعدارلامالارى مەن سيفرلىق مەملەكەتتىك باسقارۋعا بايلانىستى جاڭا باعىتتار كۇتىپ تۇر. ءارىز-وتىنىشتى Admission اقپاراتتىق جۇيەسى ارقىلى بيىلعى 25 ماۋسىمعا دەيىن ونلاين فورماتتا قابىلدايدى.
«بيىل ماگيستراتۋراعا 120، دوكتورانتۋراعا 12 مەملەكەتتىك گرانت ءبولىندى»، - دەپ حابارلادى، اينۋر يدريسوۆا.
12 ءبىلىم بەرۋ باعدارلاماسىنا ىرىكتەۋ جۇرگىزىلىپ جاتىر ءقازىر. ونىڭ 9-ى ماگيسترلىك («MPA – مەملەكەتتىك باسقارۋ»، «MPP – مەملەكەتتىك ساياسات»؛ «MIR – حالىقارالىق قاتىناس»؛ «ME – ەكونوميكا»؛ «MRD – وڭىرلىك دامۋ»؛ «MHRM – ادام رەسۋرسىن باسقارۋ»؛ «MDPA – سيفرلىق مەملەكەتتىك باسقارۋ»؛ «EMPA – مودۋلدىك وقىتۋ ارقىلى مەملەكەتتىك باسقارۋ»؛ «MRDm – مودۋلدىك وقىتۋ ءپرينسيپى بويىنشا وڭىرلىك دامۋ») جانە 3 دوكتورلىق («DPA – مەملەكەتىك باسقارۋ»؛ «DE – ەكونوميكا»؛ «DIR – حالىقارالىق قاتىناس»).
سونىمەن بىرگە، قابىلداۋ كوميسسياسىنداعى نەگىزگى وزگەرىستەر دە ايتىلدى.
«اقپاراتتىق قاۋىپسىزدىك پەن مەملەكەتتىك سەكتوردى سيفرلاندىرۋعا اتسالىساتىن ساراپشىلاردى دايارلايتىن MDPA-نىڭ «سيفرلىق مەملەكەتتىك باسقارۋ» ماگيسترلىك باعدارلاماسىنىڭ اشىلۋى ۇلكەن جاڭالىق بولدى. وسى ءبىرجىلدىق باعدارلاماعا وقۋعا ءتۇسۋ ءۇشىن سيفرلىق سالادا ءبىر جىل جۇمىس ىستەگەن تاجىريبەسى بولۋى كەرەك، ال ەگەر وسىعان بايلانىستى وقۋ بىتىرگەن بولسا، مەملەكەتتىك قىزمەتتە جوق دەگەندە ءۇش جىلداي جۇمىس ىستەگەن تاجىريبەسى بولۋى ءتيىس»، - دەپ ءتۇسىندىردى اينۋر يدريسوۆا.
بۇدان بولەك، «MPA – مەملەكەتتىك باسقارۋ» (5 جىل) مەن «MPP – مەملەكەتتىك ساياساتتى» (4 جىل) قوسپاعاندا، قالعان بارلىق ماگيسترلىق باعدارلامالارعا مەملەكەتتىك قىزمەتتەگى ەڭبەك وتىلىنە قويىلاتىن تالاپ تا وزگەرگەن (3 جىلعا دەيىن).
اقىلى بولىمگە ءتۇسۋدىڭ شارتى دا وزگەرگەن. بۇدان بىلاي مەملەكەتتىك قىزمەتكەرلەر دە، مەملەكەتتىك ورگانداردىڭ مەكەمەسىنە قاراستى ۇيىمدارىنىڭ قىزمەتكەرلەرى مەن كۆازيمەملەكەتتىك سەكتوردىڭ قىزمەتكەرلەرى دە اقىلى بولىمدە وقي الاتىن بولدى. سونىمەن بىرگە، ىرىكتەۋدى جەتىلدىرە ءتۇسۋ ءۇشىن ءبىلىم بەرۋ باعدارلامالارىنىڭ ءارقايسىسىنا تۇسەتىندەرگە قويىلاتىن تالاپ تا ناقتىلانىپ وتىر.
ۇمىتكەرلەر مىنا قۇجاتتاردى ۇسىنۋى كەرەك:
1. مەملەكەتتىك ورگاننىڭ باعىتى (تەك مەملەكەتىك قىزمەتكەرلەرگە ارنالعان). مەملەكەتتىك گرانتقا كانديدات، باستىعى مەن اپپاراتتىڭ باسشىسى قول قويعان جولداما ۇسىنۋعا مىندەتتى.
2. قۇجاتتىڭ ەلەكتروندى كوشىرمەسىن، جەكە كۋالىگىن.
3. جوعارعى ءبىلىمى تۋرالى قۇجاتتىڭ كوشىرمەسىن قوسىمشاسىمەن بىرگە (ماگيستراتۋراعا تۇسۋگە) نەمەسە جوعارۋ وقى ورنىن بىتىرگەن سوڭ ءبىلىم العانى تۋرالى قۇجاتتىڭ كوشىرمەسىن قوسىمشاسىمەن (دوكتورانتۋراعا تۇسۋگە).
4. شەتەلدىكتەردى قوسپاعاندا، مەملەكەتتىك ءتىلدى ۆ1 دەڭگەيىنەن كەم بىلمەيتىنىن دالەلدەيتىن QAZAQ RESMI TESTء-تى نە قازتەست-تىڭ سەرتيفيكاتىن. QAZAQ RESMI TEST وسى اكادەميانىڭ بازاسىندا جاسالعان. تەستى كەز كەلگەن ۋاقىتتا، كەز كەلگەن وڭىرىندە تۇرىپ ونلاين تاپسىرا بەرەسىز.
5. MPA (مەملەكەتىك باسقارۋ)، MIR (حالىقارالىق قاتىناس) باعدارلاماسى مەن دوكتورانتۋرانىڭ باعدارلاماسىنا مىنا (IELTS، TOEFL IBT نەمەسە TOEFL ITP، TOEIC) حالىقارالىق سەرتيفيكاتتاردىڭ ءبىرىن تاپسىرادى.
6. مەملەكەتتىك قىزمەتكەرلەرگە – قىزمەتتىك جازبا، باسقا ۇمىتكەرلەرگە – ەڭبەك ءوتىلىن كۋالاندىراتىن قۇجات كەرەك.
7. دوكتورانتۋراعا – باعالاناتىن Research proposal (زەرتتەۋ جۇمىسىنىڭ جوباسى).
8. ءوتىنىش (ەسپ).
ىرىكتەۋ جۇمىسى ەكى كەزەڭنەن تۇرادى: 28 ماۋسىم مەن 1 شىلدە ارالىعىندا وتەتىن ءبىرىنشى كەزەڭدە – ونلاين-فورماتتا ساراپتامالىق ەسسە جازىلادى. دوكتورانتۋراعا ۇمىتكەرلەر ءبىرىنشى كەزەڭدە Research proposal باعالانادى. شىلدەنىڭ 8-23 ارالىعىنداعى ەكىنشى كەزەڭدە اكادەميادا سۇقبات وتەدى.
بايقاۋدىڭ ارالىق قورىتىندىسى 25 شىلدە كۇنى جاريالانادى. قورىتىندى شىققان سوڭ، تالاپكەرلەر 7 تامىزعا دەيىن قۇجات تاپسىرىپ ۇلگەرۋى كەرەك. وقۋ 1 قىركۇيەكتە باستالادى.
«اكادەميادا وقۋدىڭ ارتىقشىلىعىن دا ايتا كەتكىمىز كەلەدى. بۇل جەردە وقۋدى پراكتيكامەن ۇشتاستىرىپ، كاسىبي تۇرعىدا شىڭدالىپ، قىزمەتى وسەدى. قىزمەتتەگى اداممەن بىردەي ستيپەنديا الادى، شەتەلگە تاجىريبە الماسۋعا بارىپ قايتۋى مۇمكىن، عىلىمي زەرتتەۋ دە جاساي الادى، جوبانى قورعاي الادى، جاس مەملەكەتتىك قىزمەتكەرلەر ۇيىندە تۇرىپ، تاجىريبەلى پروفەسسورلار مەن ەكسپەرتتەردەن ءتالىم الادى»، - دەپ اتاپ ءوتتى اينۋر يدريسوۆا.
وقۋعا ءتۇسۋدىڭ ءمان-جايى تۋرالى تولىق اقپاراتتى اكادەميانىڭ رەسمي سايتى - apa.kz پەن الەۋمەتتىك جەلىدەن وقي الاسىزدار. اكادەميانىڭ بولىمشەسى مەن قابىلداۋ كوميسسياسىندا دا قوسىمشا تاعى تۇسىندىرەدى تالاپكەرگە.