وعان قازاقستان جازۋشىلار وداعىنىڭ ءتوراعاسى مەرەكە قۇلكەنوۆ، وزبەكستان جازۋشىلار وداعى ءتوراعاسىنىڭ ورىنباسارى مينحودجيددين حوجيماتوۆ، ەكى ەلدىڭ تانىمال قالامگەرلەرى قاتىستى، دەپ حابارلايدى aqshamnews.kz
كەزدەسۋدىڭ نەگىزگى تاقىرىبى – ادەبي بايلانىستى نىعايتۋ جانە ادەبيەتتىڭ وقىرماندارعا ىقپالى. قازاق پەن وزبەك حالقىنىڭ ادەبيەتى مەن مادەنيەتى تەرەڭ تاريحي جانە رۋحاني بايلانىسقا يە ەكەنى بارشاعا ءمالىم. بۇل جاقىندىقتىڭ قاينار باستاۋى ورتاق تۇركىلىكتە جاتقانى بەلگىلى.
قازىرگى ۋاقىتتا دا بۇل ءۇردىس جالعاسۋدا. قازاق پەن وزبەك ادەبيەتىنىڭ جاڭا بۋىن وكىلدەرى شىعارمالارىن بىر-بىرىنە اۋدارىپ، ادەبي بايلانىستاردى نىعايتۋدا. وزبەكستاننان كەلگەن دەلەگاسيا ق ر ۇلتتىق كىتاپحاناسىن ارالادى. سيرەك كىتاپتار مەن قولجازبالار قىزمەتىندە ارنايى كورمە ۇيىمداستىرىلىپ، قوناقتار قوردا ساقتالعان بىرەگەي مۇرالارمەن تانىستى. ولاردىڭ قاتارىندا XVIII عاسىرداعى قۇران، قوجا احمەت ءياساۋيدىڭ «ريسالا» (XVI ع.)، «ديۋاني حيكمەت» (XIX ع.)، «حيكمەت حازرەتيى» (XVIII ع.)، سونداي-اق ونىڭ اتا-تەگى تۋرالى تاريحي شەجىرە «ناسابناما» (XVII ع.) جانە شاكىرتى سۇلەيمەن باقىرعانيدىڭ «حيكمەتتەرى» بار. سونىمەن قاتار شىعىس ادەبيەتىنىڭ جاۋھارلارى – نيزامي گانجاۋيدىڭ «حامسا» (XV ع.)، الىشەر ءناۋايدىڭ «ديۋانى» (XVII ع.)، ءابىلقاسىم ءفيردوۋسيدىڭ «شاھناماسى» (XVIII ع.) دا ەرەكشە نازارعا ىلىكتى. ءىس-شارا اياسىندا وزبەكستاننىڭ ادەبيەتى مەن مادەنيەتىنە ارنالعان كىتاپ كورمەسى ۇيىمداستىرىلدى.
وزبەكستان رەسپۋبليكاسىنان كەلگەن دەلەگاسيا قۇرامى مەن قازاق قالامگەرلەرى قازاقتىڭ باس اقىنى ابايدىڭ ەسكەرتكىشىنە تاعزىم ەتىپ، گۇل شوقتارىن قويدى. سونىمەن قاتار، اكادەميك، كلاسسيك جازۋشى مۇحتار اۋەزوۆتىڭ مۋزەي-ۇيىنە بارىپ، تاريحي جادىگەرلەرمەن تانىستى.
ايتا كەتەيىك، بۇعان دەيىن تۇركىستاندا قازاقستان مەن وزبەكستاننىڭ بەلسەندى جاستارىنىڭ قاتىسۋىمەن «دوستىق كوپىرى» فورۋمى وتكەن بولاتىن. فورۋمدا جۇمىسشى ماماندىقتاردى ناسيحاتتاۋ جانە ەڭبەك نارىعىنا جاساندى ينتەللەكتتىڭ اسەرى سەكىلدى ماسەلەلەر تالقىلاندى.