الماتىدا اباي اتىنداعى قازاق ۇلتتىق وپەرا جانە بالەت تەاترىندا قازاقستان جازۋشىلار وداعىنىڭ كەزەكتى حVI قۇرىلتايى ءوتتى.
قۇرىلتايعا جازۋشىلار وداعىنىڭ باسقارما مۇشەلەرىمەن قاتار، ەلىمىزدىڭ بارلىق وڭىرلەرىندەگى مۇشەلەرى، فيليال ديرەكتورلارى، سونىمەن قاتار الىس-جاقىن شەت ەلدەردەن قۇرمەتتى قوناقتار، ونەر جانە عىلىم قايراتكەرلەرى قاتىستى.
100 جىلعا جۋىق تاريحى بار قازاقستان جازۋشىلار وداعى ەلىمىزدىڭ قوعامدىق، ساياسي ومىرىنە بەلسەنە ارالاسىپ كەلەدى. بۇگىنگى تاڭدا 963 مۇشەسى بار بۇل وداقتىڭ ەل وڭىرلەرىندە 19 فيليالى جۇمىس ىستەيدى.
حVI جازۋشىلار قۇرىلتايىنا ارنايى كەلگەن قازاقستان جازۋشىلار وداعىنىڭ مۇشەسى، ق ر اقپارات جانە قوعامدىق دامۋ ءمينيسترى د. ءقىدىرالى قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆتىڭ سەزد دەلەگاتتارىنا جولداعان ارنايى قۇتتىقتاۋ ءسوزىن وقىپ بەردى.
سەزد قاتىسۋشىلارى سوڭعى رەت 5 جىل بۇرىن وتكىزىلگەن قۇرىلتايدان بەرگى ۋاقىتتا ومىردەن وتكەن اقىن-جازۋشىلاردى ەسكە الىپ، ءبىر مينۋت ۇنسىزدىك جاريالادى.
سەزدىڭ رەسمي كۇن تارتىبىنە سايكەس قازاقستان جازۋشىلار وداعى باسقارماسىنىڭ ءتوراعاسى – ۇلىقبەك ەسداۋلەت اتقارىلعان جۇمىستار تۋرالى، باقىلاۋ-تەكسەرۋ كوميسسياسىنىڭ ءتوراعاسى – الىبەك اسقاروۆ قوعامدىق ۇيىمنىڭ بەسجىلدىق ەسەبى بويىنشا بايانداما جاسادى.
قۇرىلتايدىڭ جۇمىس ءتارتىبى بويىنشا قازاقستان جازۋشىلار وداعى باسقارماسىنىڭ جاڭا مۇشەلەرى سايلانىپ، جابىق داۋىس بەرۋ ناتيجەسىمەن قازاقستان جازۋشىلار وداعىنىڭ ءتوراعالىعىنا قازاقستاننىڭ ەڭبەك سىڭىرگەن قايراتكەرى، «جۇلدىز» جۋرنالىنىڭ باس رەداكتورى مەرەكە قۇلكەنوۆتى سايلادى.
جاڭادان سايلانعان ءتوراعانىڭ ۇسىنىسىمەن باسقارما مۇشەلەرىنە وداق ءتوراعاسىنىڭ ورىنباسارلارى مەن حاتشىلارىنىڭ كانديداتۋراسىن ۇسىنىپ، كوپشىلىك داۋىسپەن نۇرجان قۋانتاي ۇلى، باۋىرجان جاقىپ، قاسىمحان بەگمانوۆ، عالىم قاليبەك، بەيبىت سارىباي — (جاستار جونىندەگى ورىنباسارى) ماقۇلدانىپ، بەكىتىلدى.
ءىس-شارا سوڭىندا قازاقستان جازۋشىلار وداعىنىڭ XVI قۇرىلتاي قاتىسۋشىلارىنا ارنالعان ۇندەۋى وقىلدى.