الماتىدا قوقىستاردى سۇرىپتاۋ كەزىندە اڭشى مىلتىعى تابىلدى، – دەپ حابارلايدى اlmaty-akshamy.kz.
پوليسياعا قوقىس سۇرىپتايتىن زاۋىتتان دابىل كەلىپ ءتۇستى. ابونەنتتىڭ ايتۋىنشا، مەتالل بۇيىمدار قويماسىنان قارۋ تابىلعان. وقيعا ورنىنان جەدەل-تەرگەۋ توبى توز-12 ماركالى 12 كاليبرلى مىلتىقتى تاركىلەدى. بۇل دەرەك بويىنشا تەرگەۋ باستالدى. ساراپتاما تاعايىندالدى، ونىڭ قورىتىندىسى بويىنشا قارۋدىڭ كىمدىكى ەكەنى جانە قايدان الىنعانى انىقتالاتىن بولادى. پوليسيا قازىرگى ۋاقىتتا وتكىزىلىپ جاتقان كەڭ اۋقىمدى رەسپۋبليكالىق “قۇقىقتىق ءتارتىپ” ءىس-شاراسى اياسىندا ازاماتتىق جانە قىزمەتتىك قارۋ يەلەرى مەن پايدالانۋشىلارىنىڭ قارۋ اينالىمى ەرەجەلەرىن ساقتاۋىنا قاتىستى تەكسەرىس جۇرگىزىلىپ جاتقانىن ەسكە سالدى.
– ءىس-شارا باستالعاننان بەرى قارۋدى ساقتاۋ ەرەجەلەرىن بۇزۋدىڭ 190-نان استام دەرەگى انىقتالدى. سونىمەن قاتار زاڭسىز اينالىمنان 8 بىرلىك تىركەلمەگەن قارۋ، سونداي-اق تەگىس ۇڭعىلى قارۋدىڭ پاتروندارى تاركىلەندى. اتالعان دەرەكتەر بويىنشا ءتيىستى پوليسيا بولىمدەرىمەن سوتقا دەيىنگى تەرگەۋ امالدارى جۇرگىزىلۋدە. الماتى پوليسياسى قارۋ يەلەرىن ازاماتتىق جانە قىزمەتتىك قارۋ اينالىمى سالاسىنداعى زاڭناما تالاپتارىن مۇلتىكسىز ساقتاۋعا، رۇقساتتاردىڭ قولدانىلۋ مەرزىمىن جانە ولاردى تۇرعىلىقتى جەرى بويىنشا ساقتاۋ ەرەجەلەرىن قاتاڭ ساقتاۋعا شاقىرادى، – دەدى الماتى قالالىق پد اكىمشىلىك پوليسيا باسقارماسىنىڭ باستىعى اسحات قۇلبايەۆ.