«Green Recycle» ج ش س قوقىس سۇرىپتاۋ كەشەنىنىڭ اۋماعىندا الماتىنىڭ الاتاۋ اۋدانىندا قاتتى تۇرمىستىق قالدىقتى شىعارۋ ءۇشىن 50 جاڭا مامانداندىرىلعان اۆتوكولىكتى بەرۋ ءراسىمى ءوتتى. ءىس-شاراعا قازاقستان رەسپۋبليكاسىنىڭ ەكولوگيا جانە تابيعي رەسۋرستار ءمينيسترى ەرلان نىسانبايەۆ پەن الماتى قالاسىنىڭ اكىمى دارحان ساتىبالدى قاتىستى.
تەحنيكانى بەرۋ ءراسىمى قورشاعان ورتانىڭ ساپاسىن جاقسارتۋعا جانە تازالىق مادەنيەتىن دامىتۋعا باعىتتالعان «تازا قازاقستان» رەسپۋبليكالىق ەكولوگيالىق باستاماسى اياسىندا ءوتتى. جوبا «جاسىل دامۋ» اق جانە «اق ءتارتىپ» جشس-مەن بىرلەسىپ جۇزەگە اسىرىلۋدا جانە الماتىدا قالدىقپەن جۇمىس ىستەۋدىڭ بارلىق جۇيەسىن جاڭعىرتۋدى كوزدەيدى.
جاڭا تەحنيكا قالدىق شىعارۋدىڭ تيىمدىلىگىن قامتاماسىز ەتەدى، قالاداعى سانيتارلىق ستاندارتتى ارتتىرادى. اۆتوپارك JAC N200 ماركالى زاماناۋي ماشينالارمەن تولىقتى. تەحنيكا كران-مانيپۋلياتورلىق قوندىرعىلارمەن جابدىقتالعان جانە قالا جاعدايىنا بەيىمدەلگەن. وسىنىڭ ارقاسىندا كاسىپورىن قالدىق شىعارۋدىڭ جۇيەلىلىگى مەن ساپاسىن ارتتىرىپ، كوممۋنالدىق قىزمەت سالاسىندا 50-گە جۋىق جاڭا جۇمىس ورنىن اشا الادى.
جوبانى قارجىلاندىرۋ «جاسىل دامۋ» اق ارقىلى جىلدىق 3%-بەن 7 جىلعا دەيىنگى مەرزىممەن بەرىلگەن «ونەركاسىپتى دامىتۋ قورى» اق-نىڭ جەڭىلدەتىلگەن قارىزى ەسەبىنەن جۇزەگە اسىرىلدى. قارجى كادەگە جاراتۋ تولەمىنىڭ تەتىگى اياسىندا بولىنگەن.
ەكولوگيا ءمينيسترى ەرلان نىسانبايەۆ الماتىنىڭ مەملەكەتتىك قولداۋدى ءتيىمدى پايدالانۋدا ۇلگى كورسەتىپ وتىرعانىن اتاپ ءوتتى.
الماتى اكىمى دارحان ساتىبالدى بۇل ءىس-شارا شاھارداعى قالدىقتى باسقارۋدىڭ ەكولوگيالىق ءقاۋىپسىز ءارى ءتيىمدى جۇيەسى مەن جايلى قالالىق ورتانى قۇرۋ جولىنداعى ماڭىزدى قادام بولعانىن اتاپ ءوتتى.
«الماتىدا قتق جيناۋ ءۇشىن ينفراقۇرىلىمدى جاڭعىرتۋ جۇمىستارى جۇيەلى تۇردە جۇرگىزىلىپ جاتىر. ءبىز مامانداندىرىلعان تەحنيكانىڭ سانىن دايەكتى تۇردە ارتتىرامىز، كونتەينەرلىك الاڭداردى جاڭارتامىز، بولەك جيناۋ جۇيەسىن ەنگىزەمىز. جاڭا تەحنيكانى بەرۋ قالاداعى سانيتارلىق جاعدايدى جاقسارتۋعا جانە جاسىل ەكونوميكانى ودان ءارى دامىتۋعا قوماقتى ۇلەس»، - دەدى دارحان ساتىبالدى.
تەحنيكانى بەرۋ راسىمنەن كەيىن ءىس-شاراعا قاتىسۋشىلار الماتىدا قۇرىلعان تىگىنەن ينتەگراسيالانعان قتق باسقارۋ كونسورسيۋمىنا كىرەتىن «Green Recycle» ج ش س قوقىس سۇرىپتاۋ كەشەنىنىڭ جۇمىسىمەن تانىستى. 2018 جىلى پايدالانۋعا بەرىلگەن زاۋىت زاماناۋي يتالياندىق جابدىقتا تاۋلىگىنە 1500 تونناعا دەيىن قالدىقتى سۇرىپتاي الادى. كاسىپورىندا 650-دەن استام ادام جۇمىس ىستەيدى.