الماتىدا «قولىنىڭ سۇعاناعى بار» قوس ۇرى قولعا ءتۇستى

الماتىلىق پوليسەيلەر كەڭسەلەردەن 21 ۇرلىق جاسادى دەگەن كۇدىكپەن ەكى ازاماتتى ۇستادى.

قالالىق كريمينالدىق پوليسيانىڭ مالىمەتىنشە، ەكى ەر ادام – 26 جاستاعى س. ەسىمدى ازامات جانە 27 جاستاعى ى. ەسىمدى ازامات بىرنەشە ۇرلىق جاسادى دەگەن كۇدىككە ءىلىندى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«الدىن الا مالىمەتتەر بويىنشا، كۇدىكتىلەر نەگىزىنەن تاماقتاندىرۋ ورىندارىندا، سۇلۋلىق سالوندارىندا، مەديسينالىق ورتالىقتا جانە سپورت زالدارىندا ۇرلىق جاساپ جۇرگەن. ءبىر سوزبەن ايتقاندا، ادام كوپ بولاتىن جەردە: تىنىش قانا ۇرلىقتى جاساپ، ادامدار اراسىندا اداسىپ كەتۋگە بولادى. سوڭعى جاعدايدا سپورت ستاديونىنا كەلگەن ادام كيىم اۋىستىراتىن بولمەدە 80 مىڭ تەڭگەسىن ۇرلاتىپ العان. تاعى بىرىندە كاراوكە-باردىڭ كليەنتى ۇيالى تەلەفونىن جوعالتىپ العان. قاسكويلەردەن كەلگەن شىعىندى بويجەتكەن 370 مىڭ تەڭگەگە باعالاعان. كۇدىكتىلەر الاتاۋ اۋدانىنداعى جەكە سەكتوردان دا ۇرلىق جاساعان: ەركىن كىرۋ ارقىلى ماتەريالدىق قۇندىلىقتارى بار دۇنيەلەردى ۇرلاعان»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.

قازىرگى ۋاقىتتا ۇستالعانداردىڭ وسىعان ۇقساس باسقا دا قىلمىستارعا قاتىسى بار-جوعى انىقتالىپ جاتىر. ودان ءارى جەدەل-ىزدەستىرۋ جانە تەرگەۋ شارالارى جۇرگىزىلىپ جاتىر. قىلمىستىق ءىس بويىنشا باسقا دا مالىمەتتەر ق ر قپك-نىڭ 201-بابى جانە ق ر كونستيتۋسياسىنىڭ نورمالارىنا سايكەس جاريا ەتۋگە جاتپايدى.