بيىلعى جىلدىڭ العاشقى قولونەر جارمەڭكەسى اشىق اسپان استىندا وتەدى.
الماتىدا دەمالىس كۇندەرى (25، 26 اقپاندا) قولونەر جارمەڭكەسى وتەدى، دەپ حابارلايدى اlmaty-akshamy.kz
جىبەك جولى داڭعىلىنىڭ جاياۋ جۇرگىنشىلەرگە ارنالعان بولىگى كىلەمدەر، سىرلانعان ىدىس-اياقتار، ەتنيكالىق ستيلدەگى ءتۇرلى اشەكەيلەر، كيىز بەن جىبەك كيىمدەر، بىلعارىدان جاسالعان بۇيىمدار مەن قولونەردىڭ بارلىق تۇرىنە تولى بولادى. قولونەر شەبەرلەرى ءوز تاۋارلارىن ەلىمىزدىڭ ءار وڭىرىنەن، ءتىپتى كورشىلەس ەلدەردەن اكەلگەن.
الماتىلىقتار مەن قالا قوناقتارى وتاندىق جانە شەتەلدىك شەبەرلەر، قولونەرشىلەر مەن سۋرەتشىلەردىڭ قولىنان شىققان ەكسكليۋزيۆتى بۇيىمداردى تاماشالاپ، ساتىپ الا الادى.
«بۇل - قولونەر جارمەڭكەسىنىڭ 26-شى ماۋسىمى. مۇندا ءسىز دايىن بۇيىمداردى ساتىپ الىپ، جەكە تاپسىرىستار جاساي الاسىز، شەبەرلەرمەن ءار بۇيىمنىڭ جاسالۋ تاريحى تۋرالى سويلەسە الاسىز، ونىڭ قانداي ماتەريالدان جاسالعانىن ءبىلىپ، وعان كۇتىم جاساۋ ەرەجەلەرىن بىلە الاسىز. جارمەڭكەگە قازاقستاندىق شەبەرلەر، قولونەرشىلەر مەن سۋرەتشىلەر، سونداي-اق قىرعىزستان، وزبەكستان جانە رەسەيدەن كەلگەن شەبەرلەر قاتىسادى»، – دەدى الماتى قالالىق قولونەر پالاتاسىنىڭ جەتەكشىسى ريمما نۇرتايەۆا.