بۇگىن، 13 قازان جۇمادا جازۋشىلار وداعىنىڭ كىتاپحاناسىندا «قوبدانىڭ قوڭىر جەلى» اتتى قوس تومدىقتىڭ تۇساۋى كەسىلىپ، وقىرماندارعا جول تارتتى، دەپ حابارلايدى اlmaty-aqshamy.kz.
قوس تومدىقتا موڭعولياداعى 100-دەن استام قازاق قالامگەرىنىڭ ەڭبەكتەرى توپتاستىرىلعان.
«قوبدانىڭ قوڭىر جەلى» الماتىلىق ادەبي قاۋىمعا بۇگىن جەتتى. بۇعان دەيىن موڭعولياداعى قازاق قانداستارى ورتاسىندا جانە استانادا تۇساۋى كەسىلىپ، ارنايى ءىس-شارالار وزدىرىلعان بولاتىن. الماتىداعى تۇساۋكەسەرى جازۋشىلار وداعى قۇرامىنداعى شەتەل قازاق ادەبيەتى كەڭەسىنىڭ كەزەكتى وتىرىسى اياسىندا وتكىزىلدى.
جيناقتا موڭعوليا جەرىندەگى قازاق قالامگەرلەرىنەن شىققان 36 پروزاشى مەن 84 اقىننىڭ شىعارمالارىن «پروزا» جانە «پوەزيا» سىندى ەكى تومعا جيناقتالعان. اتالعان ەڭبەك قازاق پوەزياسىنىڭ اسا كورنەكتى وكىلى، اي ماڭداي اقىن سۇراعان راحمەت ۇلىنىڭ جەتەكشىلىگىندە قۇراستىرىلعان.
«قوبدانىڭ قوڭىر جەلى» جيناعىنىڭ الماتىداعى تۇساۋىن ايگىلى اقىن، دراماتۋرگ يران عايىپ پەن ۇزاق جىلدان بەرى شەتەل قازاق ادەبيەتى مەن فولكلورىن زەرتتەپ كەلە جاتقان عالىم زۇفار سەيىتجان كەستى.
ايتا كەتەيىك، «قوبدانىڭ قوڭىر جەلى» جيناعىنىڭ شىعۋىنا «زەينوللا سانىك» مادەنيەت قورى قوللاۋ كورسەتكەن. قور ءتوراعاسى قانات زەينوللا بۇعان دەيىندە جازۋشىلار وداعى مەن وزگە دە ورتالىقتاردىڭ ادەبي ءھام مادەني ءىس-شارالارىنا، جەكەلەگەن اۆتورلاردىڭ ەڭبەكتەرىنىڭ جارىق كورۋىنە قولداۋ كورسەتىپ كەلە جاتىر.
تۇساۋكەسەرمەن قاتار وتىرىستا ادەبي كەڭەس الداعى جىلداعى شەتەل قازاق قالامگەرلەرىنىڭ شىعارمالارىن اتاجۇرتتاعى وقىرماندارعا تانىستىرۋ بويىنشا جوسپارلارىن تانىستىردى. كەڭەس مۇشەلەرى ءوز ۇسىنىستارىمەن ءبولىستى. سونداي-اق، شەتەل قازاق قالامگەرلەرى مەن ولاردىڭ بىرلەستىكتەرىنىڭ جاساپ جاتقان يگى ىستەرىن دە اتاپ ءوتتى.
كەڭەس ءتوراعاسى ارميابەك ساعىندىق ۇلىنىڭ ايتۋىنشا وزبەكستان قازاق جازۋشىلارى مەملەكەتتىك باعدارلامامەن تۇركى الەمىنىڭ 100 تومدىعىن شىعارعان. سولاردىڭ اراسىندا 10 تومدىعى قازاق ادەبيەتىنىڭ وكىلدەرىنە ارنالعان. ال، قىتايداعى قازاق قالامگەرلەرى قازاقستانداعى ادەبيەت وكىلدەرىنىڭ 2 تومدىعىن باسپادان شىعارعان جانە ونى جۇڭگو تىلىنە اۋدارىپ تاراتقان.
جازۋشىلار وداعى الداعى ۋاقىتتا شەتەلدەگى قالامگەرلەرمەن ادەبي الماسۋدى ءتىپتى دە دامىتا ءتۇسۋدى جوسپارلاپ وتىرعانىن ايتادى.