بۇگىن الماتى قالاسىندا Almaty Digital Medical Center (ADMC) - قازاقستانداعى تۇڭعىش سيفرلىق مەديسينا ورتالىعىنىڭ اشىلۋ ءراسىمى ءوتتى. جوبا الماتى قالاسى قوعامدىق دەنساۋلىق ساقتاۋ باسقارماسى مەن سيفرلاندىرۋ باسقارماسى اراسىنداعى مەموراندۋم اياسىندا جۇزەگە اسىرىلدى.
ءىس-شاراعا الماتى قالاسى قدسب باسشىسى ورىنباسارىنىڭ م.ا. لايلا يمانگالييەۆا قاتىستى.
ورتالىقتى قۇرۋدىڭ باستى ماقساتى - قالانىڭ دەنساۋلىق ساقتاۋ جۇيەسىنىڭ اشىقتىعى مەن تيىمدىگىن ارتتىرۋ. سيفرلىق مەديسينا ورتالىعى - ەمحانا جۇمىسىن، تۇرعىنداردىڭ دەنساۋلىعىن باقىلاۋدى جانە حالىقپەن بايلانىستى تۇبەگەيلى وزگەرتەتىن كەشەندى سيفرلىق پلاتفورما.
ADMC قۇرامىنا كىرەتىن نەگىزگى سيفرلىق قىزمەتتەر:
- اقپاراتتىق-تالداۋ ورتالىعى
- ءبىرىڭعاي بايلانىس ورتالىعى - 1312
- تەلەمەديسينالىق پاتروناج
- جاساندى ينتەللەكت نەگىزىندەگى ۆيرتۋالدى داۋىستىق كومەكشى
- تەلەمەديسينا قىزمەتى
- اقپاراتتىق-تالداۋ ورتالىعى
جاساندى ينتەللەكت كومەگىمەن ەسەپتىلىك قالىپتاستىراتىن، ءوڭىردىڭ اۋقىمدى مەديسينالىق دەرەگىن وڭدەۋدى قامتاماسىز ەتەتىن جانە مساك جەلىسىنىڭ بيزنەس-پروسەستەرىن قايتا قۇرۋمەن اينالىساتىن ساراپشىلار توبى. ورتالىق ماماندارى دەنساۋلىق كورسەتكىشتەرىن ناقتى ۋاقىت رەجيمىندە باقىلاپ، تالداپ، الىنعان اقپاراتتى باسقارۋشىلىق شەشىم قابىلداۋ ءۇشىن قدسب-عا جولدايدى
ءبىرىڭعاي بايلانىس ورتالىعى - 1312
الماتىلىقتاردىڭ دەنساۋلىق ساقتاۋ ماسەلەلەرى بويىنشا قوڭىراۋ قابىلدايدى، سول ارقىلى ەمحانانىڭ ءتيىمدى جۇمىسىن قامتاماسىز ەتەدى.
پاسيەنت دارىگەرگە جىلدام جازىلادى جانە سۇراقتارىنا جەدەل جاۋاپ الادى.
دارىگەرلەر مەن اكىمشىلىك قىزمەتكەرلەر قوڭىراۋعا الاڭداماي، پاسيەنتكە كوبىرەك كوڭىل بولە الادى.
كونتاكت-ورتالىق ازاماتتاردىڭ بارلىق ءوتىنىشىن قابىلداپ، جۇيەلەپ، ماڭىزدىعىنا قاراي سۇرىپتايدى جانە جۇيەلى پروبلەمالاردى تالدايدى.
بۇل شەشىم ەمحانا تىركەۋ بولىمدەرىنىڭ جانە قدسب-نىڭ جۇكتەمەسىن شامامەن 20%-عا ازايتىپ، تۇرعىنداردىڭ جوعالعان قوڭىراۋىن 1%-عا دەيىن تومەندەتۋگە مۇمكىندىك بەرەدى.
تەلەمەديسينالىق پاتروناج
پاسيەنتتەردى قاشىقتان باقىلاۋدىڭ زاماناۋي فورماتى، ول مەديسينالىق كومەكتىڭ قولجەتىمدىگىن ارتتىرىپ، مساك قىزمەتكەرلەرىنىڭ جۇكتەمەسىن ازايتادى.
تەلەپاتروناج اياسىندا مامان پاسيەنتكە قوڭىراۋ شالىپ نەمەسە ونلاين-كونسۋلتاسيا وتكىزىپ، جاعدايىن قاداعالايدى، ءدارى قابىلداۋىن ەسكە سالادى جانە دارىگەرگە بارۋدى باقىلايدى. سونىمەن قاتار كۇردەلى جاعدايدا جەدەل شەشىم قابىلداۋ ءۇشىن تەلەمەديسينالىق كونسيليۋم ۇيىمداستىرۋ مۇمكىندىگى ەنگىزىلگەن.
بۇل ءتاسىل كەزەكتى ازايتىپ، ماۋسىمدىق اۋرۋدىڭ تارالۋ ءقاۋپىن تومەندەتەدى. سونداي-اق ناۋقاستىڭ جاعدايى ناشارلاۋ ءقاۋپىن دەر كەزىندە انىقتاپ، اۋرۋحاناعا جاتقىزۋ سانىن قىسقارتۋ ارقىلى دەنساۋلىق ساقتاۋ جۇيەسىنىڭ جۇكتەمەسىن جانە قارجىلىق شىعىندى ازايتادى.
جاساندى ينتەللەكتكە نەگىزدەلگەن داۋىستىق كومەكشى
پاسيەنتتى سكرينينگكە، ۆاكسينالاۋعا، فليۋوروگرافياعا اۆتوماتتى تۇردە شاقىرادى، قابىلداۋ ۋاقىتىن ەسكە سالادى جانە ناتيجەنى تىركەيدى (كەلىسىمىن بەردى، باس تارتتى نەمەسە تەكسەرىستەن ءوتتى). بۇل سەرۆيس مەديسينا قىزمەتكەرلەرىن كۇندەلىكتى قوڭىراۋ شالۋدان بوساتادى.
مىسالى، ءبىر جىلدىڭ ىشىندە تەك فليۋوروگرافيادان ءوتۋ ءۇشىن شامامەن 545 مىڭ قالا تۇرعىنى شاقىرىلادى. مۇنداي كولەمدى قولمەن قامتۋ وتە كوپ ۋاقىتتى الادى جانە ءىس جۇزىندە مۇمكىن ەمەس. ال سكرينينگ پەن ۆاكسينالاۋدى قوسا العاندا، شاقىرتۋ ميلليونداعان قوڭىراۋعا جەتەدى. ەندى بۇل جۇمىستى داۋىستىق كومەكشى اتقارادى، ال مەديسينا قىزمەتكەرلەرى دياگنوستيكا مەن ەمدەۋگە كوبىرەك ۋاقىت بولەدى.
تەلەمەديسينا قىزمەتى
الماتىدا بۇل قىزمەت 2020 جىلدان بەرى جۇمىس ىستەيدى. ول COVID-19 پاندەمياسى كەزىندە قالا اكىمدىگى مەن قدسب باستاماسىمەن ىسكە قوسىلعان. باستاپقىدا نەگىزگى مىندەت - كوروناۆيرۋسپەن سىرقاتتانعان ناۋقاستى ءۇي جاعدايىندا قاشىقتان باقىلاۋ بولاتىن.
ءقازىر تەلەمەديسينا قىزمەتى تاۋلىك بويى جۇمىس ىستەپ، كەڭ اۋقىمدى فۋنكسيانى ورىندايدى:
- 1312 ءنومىرى ارقىلى تۇرعىندار ءوتىنىشىن قابىلدايدى؛
- ولاردى قۇزىرەتىنە قاراي ماماندارعا جولدايدى؛
- جالپى مەديسينالىق كەڭەس بەرەدى؛
- قالاداعى مەديسينالىق ۇيىم، ءدارىحانا، زەرتحانا مەن جەكە ورتالىقتار تۋرالى اقپارات ۇسىنادى.
كۇن سايىن تەلەمەديسينالىق ورتالىق ماماندارى شامامەن 1500 ناۋقاسقا قوڭىراۋ شالادى. بۇل - جەدەل جاردەم شاقىرعانىمەن، شۇعىل گوسپيتاليزاسياعا جاتپاعان پاسيەنتتەر. سونداي-اق جۇكتى ايەلدەرگە، بوسانعاندارعا جانە بالالارعا مونيتورينگ جۇرگىزىلەدى.
ونلاين-كونسۋلتاسيالار
سيفرلىق مەديسينا ورتالىعىندا جەتەكشى ماماندار ونلاين كەڭەس بەرەدى: گينەكولوگ، كارديولوگ، نيەۆروپاتولوگ، اللەرگولوگ، فتيزياتر، حيرۋرگ، فۋنكسيونالدىق دياگنوستيكا دارىگەرى، وفتالمولوگ، ەندوكرينولوگ، رەابيليتولوگ، ينفەكسيونيست، ماممولوگ، ۋرولوگ جانە لور. بۇل تۇرعىندارعا مەديسينالىق قىزمەتتىڭ كەڭ سپەكترىن زاماناۋي سيفرلىق فورماتتا ءبىر جەردەن الۋعا مۇمكىندىك بەرەدى.
حالىقارالىق تاجىريبە جانە دامۋ جوسپارى
ADMC الەمنىڭ الدىڭعى قاتارلى ەلدەرىنىڭ تاجىريبەسىن، سونداي-اق قازاقستان وڭىرلەرىنىڭ ۇزدىك تاجىريبەلەرىن ەسكەرە وتىرىپ قۇرىلدى. وسى نەگىزدە الماتى قالاسى سيفرلىق مەديسينا ورتالىعىنىڭ تۇجىرىمداماسى جاسالدى.
2026 جىلعا دەيىنگى جوسپار:
- تەلەپاتروناجدىڭ جاڭا باعىتتارىن ىسكە قوسۋ؛
- قالانىڭ بارلىق مەملەكەتتىك مەديسينالىق ۇيىمىن ءبىرىڭعاي بايلانىس ورتالىعىنا كوشىرۋ؛
- داۋىستىق كومەكشى قىزمەتىن دامىتۋ؛
- رەسەپت پەن ەڭبەككە جارامسىزدىق پاراعىن ونلاين بەرۋ؛
- تەلەراديولوگيالىق ورتالىق اشۋ؛
- جاساندى ينتەللەكت نەگىزىندەگى شەشىمدى سىناقتان وتكىزۋ ءۇشىن سيفرلىق مەديسينالىق حاب قۇرۋ.
Almaty Digital Medical Center - جاي عانا سيفرلاندىرۋ جوباسى ەمەس، مەديسينا مەن حالىقتىڭ ءوزارا ءىس-قيمىلىنىڭ جاڭا ستاندارتى.
ونىڭ تيىمدىگى دالەلدەندى:
- مەديسينا قىزمەتكەرلەرىنىڭ ونداعان مىڭ ساعاتى ۇنەمدەلدى؛
- مىڭداعان تۇرعىن مەديسينالىق قىزمەتكە ىڭعايلى قولجەتىمدىك الدى
- دەنساۋلىق ساقتاۋ جۇيەسىنىڭ جۇمىسى اشىق ءارى باسقارۋعا قولايلى بولا ءتۇستى.