سوڭعى جىلدارى ونكولوگيالىق اۋرۋدى ەرتە انىقتاۋ كورسەتكىشى ارتىپ كەلەدى، دەپ حابارلادى الماتى ونكولوگيالىق ورتالىعىنىڭ ديرەكتورى نۇرسۇلتان يزباگامبەتوۆ.
2023 جىلدىڭ 9 ايىندا بۇل كورسەتكىش 38،7%-عا ءوستى. وتكەن جىلدىڭ سايكەس كەزەڭىمەن سالىستىرعاندا ءوسۋ قارقىنى 6،7 پايىزدى قۇرادى.
سونىمەن قاتار كەيىنگى (III-IV) كەزەڭدە كورىنەتىن لوكاليزاسيادا قاتەرلى ىسىكتى انىقتاۋ كورسەتكىشى تومەندەي ءتۇستى.
2023 جىلدىڭ 9 ايىندا بۇل كورسەتكىش 6،6%-دى (2022 جىلدىڭ 9 ايىندا - 6،3%) قۇرادى.
بۇعان ماقساتتى توپتى سكرينينگتىك تەكسەرۋمەن قامتۋدىڭ ارقاسىندا قول جەتكىزىلدى، ءارى بۇل ونكولوگيالىق اۋرۋدى ەرتە كەزەڭدە انىقتاۋعا مۇمكىندىك بەرەدى. 2023 جىلدىڭ 9 ايىندا الماتىدا قاتەرلى ىسىكتى ەرتە انىقتاۋ بويىنشا سكرينينگتىك تەكسەرۋ جالپى سكرينينگتىك جوسپاردىڭ 88،8%-ىن قامتىدى.
سكرينينگتىك تەكسەرۋدىڭ ارقاسىندا 207 قاتەرلى ىسىك اۋرۋى، ونىڭ 194ء-ى (93،7%) ەرتە ساتىسىندا انىقتالدى.
سونداي-اق 922 ناۋقاستا قاتەرلى ىسىكتىڭ دامۋ ءقاۋپىن تۋدىراتىن ىسىك الدى اۋرۋى انىقتالدى. بارلىق ناۋقاس ۋاقتىلى مامانداندىرىلعان ەممەن قامتاماسىز ەتىلدى.
قاتەرلى ىسىك اۋرۋىن ەرتە كەزەڭدە انىقتاۋ ءتيىمدى، ءتىپتى تولىق ەمدەۋگە مۇمكىندىك بەرەتىنىن ەستە ۇستايىق.
قورىتىندىلاي كەلە، نۇرسۇلتان يزباگامبەتوۆ سكرينينگتىك تەكسەرۋدەن كىم جانە قاشان وتەتىنىن تاعى دا ەسكە سالدى: 40-70 جاستاعى ايەلدەر ءسۇت بەزى وبىرىنا 2 جىلدا ءبىر رەت مامموگرافيالىق سكرينينگ؛ 30-70 جاستاعى ايەلدەر 4 جىلدا ءبىر رەت ىسىك الدى جانە جاتىر موينى وبىرىنىڭ سيتولوگيالىق سكرينينگى؛ 50-70 جاس ارالىعىنداعى ەرلەر مەن ايەلدەر 2 جىلدا ءبىر رەت جاسىرىن قانعا تەست كومەگىمەن كولونوسكوپيا ارقىلى توق ىشەك پەن تىك ىشەكتىڭ قاتەرلى ىسىگى مەن ىسىك الدى اۋرۋلارىنا سكرينينگ.