الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا "قارا ريەلتورلار" قىلمىستىق توبىنىڭ مۇشەلەرىنە قاتىستى ۇكىم شىقتى، دەپ حابارلايدى aqshamnews.kz.
قىلمىستىق توپتىڭ قۇرامىندا 22 ايىپتالۋشى بار. ولاردىڭ قاتارىندا ەكى دارىگەر، ءۇش نوتاريۋس، بۇرىنعى پوليسيا قىزمەتكەرلەرى، سوت ورىنداۋشىنىڭ كومەكشىسى، مەديسينالىق ساراپشىلار، ەكى ريەلتور جانە بىرنەشە تاكسي جۇرگىزۋشىسى بار. بۇل ۇيىمداسقان قىلمىستىق توپ جالعىزباستى قارت ادامداردىڭ قايتىس بولعاننان كەيىن مۇراگەرلەرى جوق پاتەرلەردى تاۋىپ، قۇجاتتاردى قولدان جاساۋ ارقىلى باسىپ الىپ، ولاردى تومەندەتىلگەن باعامەن ساتقان.
بارلىعى 37 پاتەردى زاڭسىز يەمدەنگەن. قىلمىستىق توپتىڭ ارەكەتى 2017-2023 جىلدار ارالىعىندا الماتى قالاسىندا بولعان. وسى ۋاقىت ىشىندە 27 ازامات زارداپ شەككەن.
سوت ۇكىمى بويىنشا:
- ءاشىرالى بولتابويەۆ (وزبەكستان ازاماتى) 17 جىلعا باس بوستاندىعىنان ايىرىلدى.
- اۋەلحان ساتايەۆ 16 جىلعا باس بوستاندىعىنان ايىرىلدى.
- يرينا گاپاروۆا (زەينەتكەر) 18 جىلعا باس بوستاندىعىنان ايىرىلدى.
- مەديسينا قىزمەتكەرلەرى: پسيحيكالىق دەنساۋلىق ورتالىعىنىڭ ەكى بۇرىنعى ءبولىم مەڭگەرۋشىسى جانە الماتى وبلىستىق پسيحياتريالىق ديسپانسەرىنىڭ بۇرىنعى پسيحياتر دارىگەرى سايكەسىنشە ءۇش جىل، التى جىل جانە 10،5 جىلعا سوتتالدى. سوت ساراپشىسى ءتورت جىلعا باس بوستاندىعىنان ايىرىلدى.
- نوتاريۋستار: ءۇش نوتاريۋس قىلمىستىق جاۋاپكەرشىلىككە تارتىلىپ، ەكى ايەل التى جىلعا، ال ولاردىڭ ەر ارىپتەسى جەتى جىلعا باس بوستاندىعىنان ايىرىلدى.