بۇل تۋرالى وسى باعىتتى قاداعالايتىن قالا اكىمىنىڭ ورىنباسارى بەيبىت شاحانوۆ ايتىپ بەردى.
7 قاڭتاردان 8 قاڭتارعا قاراعان ءتۇنى جاۋا باستاعان قالىڭ قار تۇسكە دەيىن جالعاستى. قاردىڭ قالىڭدىعى ساعات 12:00-دە 15 سانتيمەترگە، ال تاۋلى ايماقتاردا 20-30 سانتيمەترگە جەتتى، دەپ حابارلايدى aqshamnews.kz.
الماتى اكىمىنىڭ ورىنباسارى بەيبىت شاحانوۆتىڭ ايتۋىنشا، كوممۋنالدىق قىزمەت كوشەلەردى، جولداردى جانە تروتۋارلاردى كۇرەۋگە جەدەل كىرىسىپ، قار شىعارۋ جۇمىستارىن تاۋلىك بويى جۇرگىزۋدە:
- 8 قاڭتار ساعات 00:00-دەن 11:00-گە دەيىن قالادا شامامەن 15 سانتيمەتر قار جاۋدى. ساعات 1:00-دە جولداردى كوكتايعاققا قارسى قوسپالار سەبۋ باستالدى. 4:30-دان باستاپ قاردى جول جيەگىنە ىسىرۋ جۇمىستارى جۇرگىزىلدى. ودان كەيىن قار ۇيىندىلەرىن قالىپتاستىرۋ، قاردى جكۇ كولىكتەرىنە تيەۋ جانە ونى ارنايى پوليگوندارعا شىعارۋ جۇمىستارى جۇرگىزىلەدى.
بۇل جۇمىس الدىمەن ورتالىق جانە ماگيسترالدى كوشەلەردە جۇرگىزىلەدى، سەبەبى تۇرعىنداردىڭ نەگىزگى بولىگى وسى جولدارمەن جۇرەدى. ودان كەيىن اۋداندىق دەڭگەيدەگى جولدارعا كوشەمىز، بۇل جۇمىستى مۇمكىندىگىنشە تەزىرەك اياقتاۋعا تىرىسامىز.
جالپى قابىلدانعان نورماعا سايكەس ماگيسترالدى كوشەلەر 3 كۇنگە دەيىن، اۋداندىق ماڭىزى بار كوشەلەر 7 كۇنگە دەيىن تازالانادى. ءبىراق ادەتتە بۇل جۇمىستى ەرتەرەك اياقتاۋعا تىرىسامىز.
كۇندىزگى ۋاقىتتا 500-گە جۋىق ارنايى قار تازالاۋ تەحنيكاسى جانە 1100-دەن استام جۇمىسشى جۇمىلدىرىلعان. تۇنگى ۋاقىتتا دا شامامەن وسىنداي كولەمدە تەحنيكا مەن جۇمىسشىلار جۇمىسقا شىعادى. نەگىزىنەن ءبىز قاردى كولىك از كەزدە تۇندە تازالاۋعا تىرىسامىز.
قالادا جولداردى قاردان تازالايتىن تەحنيكا بەلسەندى تۇردە جاڭارتىلۋدا. سوڭعى 2 جىلدا شامامەن 140 جاڭا زاماناۋي تەحنيكا ساتىپ الدىق. بۇل جۇمىس بيىل دا جالعاسىن تابادى. ءبىز جىلدامدىقتى ارتتىراتىن جانە قول ەڭبەگىن ءتيىمدى الماستىراتىن جاڭا تەحنيكالاردى ساتىپ الامىز. وسى ارقىلى قار شىعارۋ جۇمىسىنىڭ ساپاسىن جاقسارتامىز.
بىلتىر قالادا كورىكتەندىرۋ ەرەجەلەرى قابىلداندى. سوعان سايكەس، كورىكتەندىرۋ ءتولقۇجاتتارى ەنگىزىلدى. ەندى ساۋدا نىساندارى مەن مەكەمەلەر وزدەرىنىڭ اۋماعىن تازا ۇستاۋعا، سونىڭ ىشىندە قاردى كۇرەۋگە مىندەتتى. سوندىقتان ساۋدا نىساندارىن قالا تازالىعىنا بەلسەندى قاتىسۋعا شاقىرامىز.
قاردى تازالاۋعا بەلگىلى ءبىر ۋاقىت قاجەت ەكەنىن ەسكەرە وتىرىپ، تۇرعىنداردان ۋاقىتشا قولايسىزدىققا تۇسىنىستىكپەن قاراۋدى سۇرايمىز. سونىمەن قاتار، قار تازالانعانشا كولىكتى جول جيەگىنە قويماۋعا شاقىرامىز.