الماتىدا قار كوشكىنى قاۋپىنە بايلانىستى تاۋ كۋرورتىنىڭ ءبىرى جابىلدى

26-28 ناۋرىز ارالىعىندا قار كوشكىنى ءقاۋپى جوعارى دەڭگەيدە ساقتالادى.

الماتى قالاسىنىڭ تاۋلى جەرلەرىندە 28 ناۋرىزعا دەيىن قار كوشكىنى ءجۇرۋى ىقتيمال، دەپ حابارلايدى اlmaty-akshamy.kz.

الماتى قالاسىنىڭ توتەنشە جاعدايلار دەپارتامەنتى 26 ناۋرىزداعى №10 داۋىلدى ەسكەرتۋى نەگىزىندە ۇلكەن جانە كىشى الماتى وزەندەرىنىڭ باسسەيندەرىندەگى جىلىمىقتىڭ اسەرى مەن قار جامىلعىسىنىڭ تۇراقسىز جاعدايىنا بايلانىستى 26-28 ناۋرىز ارالىعىندا قار كوشكىن ءقاۋپى جوعارى دەڭگەيدە ساقتالاتىنىن مالىمدەدى.

قالالىق تجد-نىڭ مالىمەتىنشە، جىل باسىنان بەرى جالپى كولەمى 62 مىڭ تەكشە مەتردەن اساتىن قار كوشكىنى وزدىگىنەن 60-تان استام رەت جۇرگەن. زارداپ شەككەندەر بولعان جوق.

مەدەۋ اۋدانىنىڭ توتەنشە جاعدايلار باسقارماسى مەن «قازسەلدەنقورعاۋ» قىزمەتكەرلەرى بىرلەسىپ، «پيونەر» تاۋ كۋرورتى اۋماعىندا مونيتورينگ جۇرگىزدى. قازىرگى ۋاقىتتا قار كوشكىنى ءقاۋپى سەبەبىنەن تاۋ كۋرورتى جابىق. اكىمشىلىگىنە ءتۇسىندىرۋ جۇمىستارى جۇرگىزىلدى. سونىمەن قاتار، دەمالۋشىلار مەن حالىقتىڭ قاۋىپسىزدىگىن قامتاماسىز ەتۋ ماقساتىندا ىلە الاتاۋى ۇلتتىق پاركىندە (الماراسان، ايۋساي) كوشكىن ءقاۋپى تۋرالى ءتۇسىندىرۋ جۇمىستارى جۇرگىزىلىپ، جادنامالار تاراتىلىپ جاتىر. بلوك-بەكەتتەرى قويىلىپ، «قازسەلدەنقورعاۋ» قىزمەتكەرلەرىنىڭ كەزەكشىلىگى ۇيىمداستىرىلدى، - دەپ حابارلادى قالالىق تجد-دان.

الماتى قالاسى تجد مەن «قازسەلدەنقورعاۋ» مەكەمەسى تۇرعىنداردى تاۋلى جەرلەرگە بارماۋعا، قار كوشكىنىن بولدىرماس ءۇشىن قارلى بەتكەيلەرگە شىقپاۋعا شاقىرادى.