الماتى قالاسىنىڭ پوليسيا دەپارتامەنتى قاڭتار وقيعالارىنا بايلانىستى قىلمىستىق قۇقىق بۇزۋشىلىق فاكتىلەرىن اشۋدى جانە تەرگەۋ جۇمىستارىن ودان ءارى جالعاستىرۋدا. بۇل تۋرالى الماتى پوليسيا دەپارتامەنتى باستىعىنىڭ ورىنباسارى رۋستام ابدراحمانوۆ الەۋمەتتىك جەلىدە جازدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ ايتۋىنشا، بۇگىنگى تاڭدا سوتقا دەيىنگى تەرگەۋدىڭ ءبىرىڭعاي تىزىلىمىنە پوليسيا دەپارتامەنتى مەن ونىڭ اۋماقتىق بولىمشەلەرى 1481 قىلمىستىق ءىستى تىركەدى.
ولاردىڭ ىشىندە بوتەننىڭ مۇلكىن ۇرلاۋ بويىنشا 1 213، بوتەننىڭ مۇلكىن قاساقانا جويۋ بويىنشا 46، قارۋ مەن وق-دارىلەردى زاڭسىز ساقتاۋ فاكتىلەرى بويىنشا 41 ءىس بار.
جوعارىدا اتالعان قىلمىستاردى جاسادى دەگەن كۇدىكپەن 236 ادام ۇستالدى. ونىڭ ىشىندە 214-ىنە قاتىستى سوت «كۇزەتپەن ۇستاۋ» بۇلتارتپاۋ شاراسىنا سانكسيا شىعاردى. ءۇش كۇدىكتىگە قاتىستى «ەشقايدا كەتپەۋ جانە تارتىپتىلىك تانىتۋ قولحاتى» تۇرىندە بۇلتارتپاۋ شاراسى تاڭدالدى.
«جۇرگىزىلگەن جەدەل ىزدەستىرۋ ءىس-شارالارى ناتيجەسىندە زاڭسىز اينالىمنان 144 اتىس قارۋى مەن 8 مىڭنان استام ءوق-دارى تاركىلەندى. نارازىلىق اكسيالارى كەزىندە قىلمىستىق ەلەمەنتتەرمەن الماتى قالاسىنىڭ اۋماعىندا ورنالاسقان 1 602 وبەكتىگە شابۋىلدار جاسالىپ، دۇنيە-مۇلىكتەر تالقاندالدى. قازىرگى ۋاقىتتا پد تەرگەۋ بولىمشەلەرى بۇلىنگەن وبەكتىلەردىڭ جالپى سانىنىڭ 97%-ىن تەكسەرىپ شىقتى. بۇل باعىتتاعى جۇمىس اياقتالۋ ساتىسىندا»، - دەدى رۋستام ابدراحمانوۆ.