الماتى تۇرعىندارى قولدانىستاعى "ب. مومىش ۇلى" ستانسياسىنان باتىسقا قاراي مەترو باعىتىنىڭ ۇزارتىلۋىمەن تانىستى.
باس مەردىگەر "BCN Group" ("Bazis Construction") ماڭايدا تۇراتىن تۇرعىنداردى شاقىرىپ، قالانىڭ ەڭ اۋقىمدى جوباسىنىڭ بارىسىن ءوز كوزدەرىمەن كورۋگە مۇمكىندىك بەردى. قاتىسۋشىلارعا جەر ۇستىندە دە، جەر استىندا دا جۇرگىزىلىپ جاتقان كەڭ كولەمدى قۇرىلىس جۇمىستارى كورسەتىلدى.
جوبا اياسىندا جالپى ۇزىندىعى 3،1 شاقىرىم بولاتىن ەكى جەراستى توننەلى مەن اباي داڭعىلى مەن ءاشيموۆ كوشەسىنىڭ قيىلىسىنداعى سولتۇستىك-باتىس بەتكەيدە ورنالاساتىن "قالقامان" ستانسياسىن سالۋ كوزدەلگەن. توننەلدەر مەن ستانسيانىڭ تەرەڭدىگى – جەر بەتىنەن 18 مەتر.
باس مەردىگەر 1591 مەترلىك سول جاق توننەلدى تولىق قازىپ ءبىتىردى. مۇندا دانەكەرسىز جانە شپالسىز تەحنولوگيامەن رەلس توسەۋ باستالدى. بۇل پويىزداردىڭ دىبىسىن ازايتىپ، جولاۋشىلارعا جايلى قوزعالىس جاعدايىن قامتاماسىز ەتەدى. سونىمەن قاتار، قوزعالىستى اۆتوماتتاندىرىلعان باسقارۋ، ءورت ءسوندىرۋ جانە لاڭكەستىككە قارسى قاۋىپسىزدىك جۇيەلەرى ورناتىلادى.
1593 مەترلىك وڭ جاق توننەلدە دە جۇمىس قارقىندى ءجۇرىپ جاتىر، ونىڭ 840 مەترى بۇگىندە قازىلىپ قويىلعان.
"جۇمىس كۇردەلى گەولوگيالىق جاعدايلارعا بەيىمدەلگەن زاماناۋي توننەل قازۋ كەشەنىمەن جۇرگىزىلۋدە. بۇل كەشەن ديامەترى 1،5 مەترگە دەيىنگى ءىرى ۆالۋنى بار مالتا تاستى توپىراقتا قازۋعا مۇمكىندىك بەرەدى. قازۋ جىلدامدىعى – تاۋلىگىنە 4 مەتر. ايىنا 115 مەترگە دەيىن قازامىز، بۇل الماتى ءۇشىن رەكوردتىق كورسەتكىش دەۋگە بولادى. ءاربىر مەتردەن كەيىن كەشەن توننەل قابىرعالارىن تەمىربەتون سەگمەنتتەرمەن دەرەۋ قاپتاپ وتىرادى"، — دەدى ماشينيست امانبەك مىرزاگۇلوۆ.
جەر استىندا ورنالاسقان ستانسيانىڭ قۇرىلىسى دا جاقسى قارقىنمەن ءجۇرىپ جاتىر. ستانسيا قۇرامىنا پلاتفورما، ەكى ۆەستيبيۋل، ءۇش كىرەبەرىس، تەحنيكالىق بلوك پەن تومەندەتكىش قوسالقى ستانسيا كىرەدى. قۇرىلىستىڭ نورماتيۆتىك مەرزىمى – 36 اي، الايدا "BCN Group" ("Bazis Construction") بۇل جۇمىستى نەبارى 14 ايدا اياقتاۋدى جوسپارلاپ وتىر. جۇمىس كەستەسىنە سايكەس، بيىل قاراشادا بەتون جۇمىستارى اياقتالىپ، ينجەنەرلىك جۇيەلەر مەن ارلەۋ جۇمىستارىنا كوشۋ جوسپارلانۋدا. كومپانيا ستانسيا مەن توننەلدەردى ۋاقتىلى ءارى ءقاۋىپسىز پايدالانۋعا دايىنداۋ ءۇشىن قاجەتتى جابدىقتار مەن ماتەريالداردى ساتىپ الۋعا كىرىستى.
قۇرىلىسقا قالا تۇرعىندارى، اسىرەسە بولاشاق ستانسياعا جاقىن جەردە تۇراتىندار ۇلكەن قىزىعۋشىلىق تانىتىپ وتىر. ولار قۇرىلىس الاڭىن ارالاپ، ماماندارعا سۇراقتار قويىپ، اسەرلەرىمەن ءبولىستى. كوپشىلىگى جوبا اۋقىمى مەن قولدانىلىپ جاتقان زاماناۋي تەحنولوگيالارعا تاڭدانىستارىن ءبىلدىردى. تۇرعىندار بۇل ستانسيانىڭ اشىلۋىن اسىعا كۇتۋدە، سەبەبى ول اۋداننىڭ كولىك قاتىناسىن ايتارلىقتاي جاقسارتادى.
توننەل قازۋ قارقىنى تۋرالى سۇراقتارعا جاۋاپ بەرگەن جوبا ديرەكتورى مۇرات وكشەبايەۆ سول جاق توننەل اياقتالعاننان كەيىن ءبىر كەشەننىڭ الىنعانىن ايتتى. ءقازىر وڭ جاق توننەلدە جۇمىس ىستەپ جاتقان ەكىنشى كەشەن كەستەگە ساي جۇمىس ىستەۋگە تولىق جەتكىلىكتى.
جوبا بويىنشا ءۇش اۋىسىممەن 400-دەن استام تاجىريبەلى مامان جۇمىس ىستەپ جاتىر: 124 قىزمەتكەر جەر استىندا، ال 293ء-ى جەر ءۇستى جۇمىستارىندا.
بارلىق قۇرىلىس-مونتاج جۇمىسى تاپسىرىس بەرۋشىنىڭ بەكىتىلگەن جوسپارىنا سايكەس 2026 جىلدىڭ ءبىرىنشى جارتىجىلدىعىندا اياقتالادى دەپ جوسپارلانۋدا. جوبانى جۇزەگە اسىرۋ قالانىڭ كولىك ينفراقۇرىلىمى ءۇشىن ستراتەگيالىق ماڭىزعا يە جانە الماتىنىڭ ونداعان مىڭ تۇرعىنى ءۇشىن كولىك قولجەتىمدىلىگىن ايتارلىقتاي جاقسارتادى.